Demokratiyaya Yardım Fondunun (DYF) təqdimat mərasimi keçirilib

Çərşənbə günü Vətəndaş Həmrəyliyi Partiyasının (VHP) ofisində Demokratiyaya Yardım Fondunun (DYF) təqdimat mərasimi keçirilib.

Fondun yaradılmasında məqsəd demokratik proseslərin inkişafına maddi dəstəyi təmin etməkdir. Fond demokratik proseslərin inkişafı naminə aksiyalarda iştiraka görə məhkəmələrin çıxardığı yüksək cərimələri ödəmək, xaricdən Azərbaycana yayımlanan “Azərbaycan saatı” teleproqramının yayımının dayanmasının qarşısını almaq üçün ianələr toplayır. 

Təqdimat mərasimində çıxış edən Müsavat Partiyası başqanı İsa Qəmbər aksiyalarda iştiraka görə yüksək cərimələri iqtidarın demokratik hərəkatdan qorxması kimi dəyərləndirib. Belə addımlarla iqtidarın demokratik  prosesi əngəlləyə bilməyəcəyini söyləyib. Gənclərin DYF yaratmaq təşəbbüslərini alqışa layiq adlandırıb. Xalq Cəbhəsi Partiyasının sədri Əli Kərimli qurumun yaradılmasını hərəkat iştirakçılarının problemləri paylaşması kimi dəyərləndirib. 

Digər natiqlər də demokratik prinsiplər uğrunda mübarizədə belə qurumlara ehtiyac olmasına diqqət çəkərək, ölkə əhalisini dəstək olmağa səsləyiblər. 

İqtisadçı Qubad İbadoğlu demokratik mübarizə iştirakçılarını iqtidardan neft pullarını tələb etməyə çağırıb və iqtidarın 2020-ci ildə xərcləməli olduğu pulları artıq indidən xərcləməyə başlamaqda ittiham edib. Q.İbadoğlu Fondun qeydə alınması üçün uyğun rəsmi qurumlara müraciət olunması təklifi səsləndirib.

DYF-ni vətəndaş cəmiyyətinin 12 institutu təsis edib. Təsisçilər sırasında siyasi partiyalar, ictimai qurumlar və müstəqil gənclər təşkilatları da var. Fonda ianə toplanması üçün Vətəndaş Həmrəyliyi, Müsavat partiyaları, Avropa Hərəkatı, Müsbət Dəyişikliklər, Seçkilərin Monitorinqi Demokratiyanın Tədrisi, ReAl Hərəkatını ofisində ianə qutuları qoyulub.  

Tədbirin sonunda təqdimat iştirakçıları Fonda ianələrini təqdim ediblər. -05C-