İstintaq İlqar Məmmədovun təqsirini sübuta yetirmədi

Respublikaçı Alternativ (ReAl) vətəndaş hərəkatının rəhbəri İlqar Məmmədovun həbsindən keçən bir ay ərzində onun barəsində heç bir istintaq hərəkəti həyata keçirilməyib ki, bu da cinayət işinin siyasi motivlərini bir daha təsdiq edir. Bu barədə bugünki mətbuat konfransında ReAl-ın icraçı katibi Natiq Cəfərli bildirib.

O qeyd edib ki, Məmmədovun həbsinin səbəbi prezidentliyə namizəd kimi siyasi proseslərdən kənarlaşdırılması olub.

“Məmmədovun həbsinin siyasi xarakteri nə ölkədə, nə də xaricdə şübhə doğurmur”, deyən Cəfərli əlavə edib ki, ölkənin bir sıra aparıcı siyasi qüvvələri, 50-dən çox ictimai təşkilat, habelə bir çox beynəlxalq qurumlar Məmmədovun müdafiəsinə qalxıblar. Aİ və Avropa Şurasının yüksək vəzifəli nümayəndələri də iki dəfə Məmmədovu dəstəkləyib.

ReAl-ın Məclis rəhbəri Erkin Qədirli Məmmədova qarşı irəli sürülən ittihamların cəfəng olduğunu bildirib. “Məmmədovu İsmayıllı hadisələrində ittiham edirlər. Birincisi, o, iğtişaşların başladığı gündən sonrakı gün oraya gedib. İkincisi, siyasətçinin vəzifəsi insanların yanında olmaq, problem yaranan regionlara baş çəkmək, baş verənləri görmək, etirazların səbəblərini ilk ağızdan öyrənməkdir”, deyə Qədirli bildirib. 

Onun sözlərinə görə, həbs təqsirləndirilən şəxsin istintaqdan yayınması ehtimalı ilə əsaslandırılıb. “Amma indi istintaq İlqar Məmmədovdan yayınır və onun istintaq təcridxanasında saxlanılması mənasızdır”, deyə Qədirli bildirib.

ReAl-ın artıq Məmmədovun prezidentliyə namizədliyini irəli sürdüyünü xatırladan Qədirli qeyd edib ki, təşkilat seçkilərə ciddi hazırlığı davam etdirəcək. Onun fikrincə, Məmmədovun ReAl-ın elektron bazasını orta sinfin təşkil etdiyi barədə bəyanatı hakimiyyətin ciddi narahatçılığına səbəb olub. Təsadüfi deyil ki, bundan sonra hakimiyyətyönlü mətbuatda orta sinfin İlham Əliyevi dəstəkləməsi haqqında məqalələr çıxdı.

ReAl-ın İdarə Heyətinin üzvü Azər Qasımlı Bakı Siyasi Araşdırmalar Məktəbinin direktoru olan Məmmədovun Avrointeqrasiyanın fəal tərəfdarıdır və onun həbsi Avrointeqrasiya ideyalarına zərbədir.

Vəkil Xalid Bağırov bildirib ki, Məmmədovun işində də digər siyasi işlərdə olduğu kimi, əsas ittihamın mahiyyəti deyil, həbsdir. “Onlar üçün nə olursa olsun, Məmmədovu həbs etmək vacibdir. Bir ay ərzində müstəntiqlər onu bir dəfə belə dindirməyiblər”.

Məmmədova hələ yanvarın 29-da bildirilib ki, iğtişaşların təşkilində əli olmaqda şübhəli bilinir. Fevralın 4-də o, çağırış vərəqəsi göndərilmədən prokurorluğa çağırılıb və əgər istəsəydi, istintaqdan gizlənə bilərdi.

İndiyədək istintaq Məmmədovun təqsirini sübut edəcək əsaslı dəlillər yoxdur.

Bağırov həmçinin istintaq təcridxanasında Məmmədova qarşı təxribat cəhdindən danışıb. Ədliyyə Nazirliyinin keçmiş işçisini onun yanına salıblar, o, peşman olmağı, gah ölkəni tərk etməyi, sonda isə hətta özünü asmağı təklif edib və bunu ən yaxşı etiraz yolu adlandırıb.

Vəkil bildirib ki, yaxın günlərdə həbsin ev dustaqlığı ilə əvəz edilməsi haqqında yeni vəsatət verilib.

ReAl rəhbərliyi öz növbəsində ciyanət işinə xitam verilməsi və Məmmədovun prezidentliyə namizəd kimi hüquqlarının bərpa edilməsi məqsədilə siyasi addımları davam etdirmək niyyətindədir.

Baş Prokurorluqdan şərh almaq mümkün olmayıb. -06D-