Qeyri-neft sektoruna investisiyalarda özəl sektorun payı 19%-dir

Bu ilin 10 ayında Azərbaycanda əsas kapitala investisiyalar 13 mlrd manat olub. Bu, ötən ilin eyni dövründəkindən 16% çoxdur. Qeyri-neft sektoruna investisiyalarda özəl sektorun payı 19%-dir, deyə Dövlətstatkomda Turan-a bildiriblər. 

Qeyri-neft sektoruna ilin əvvəlindən 9,1 mlrd manat yönəldilib. Bu, ötən ilin eyni dövründəkindən 10% çoxdur. Qeyri-neft sənayesinə 1 890 mln manat, o cümlədən emal sektoruna 863,7 mln manat (+68,3%), elektrik enerjisi, qaz və buxar istehsalı, paylanması və təchizatına 287,7 mln manat (-8,5%), su təchizatı və tullantıların utilizasiyasına 872,1 mln (+71,3%) investisiya qoyulub.

Neft sektorunda (3,9 mlrd manat) investisiya həcminin artımı 35,8% olub.

İnvestisiyaların 74,2%-i daxili mənbələrin hesabınadır. Bunun 79,8%-i dövlət investisiyalarıdır. Dövlət büdcəsindən investisiya məqsədi ilə 6 229 mln manat, büdcədənkənar dövlət fondlarından 433 mln manat ayrılıb. Bunlar nəqliyyat - 2,7 mlrd manat, təhsil – 570 mln manat, səhiyyə və sosial xidmət – 350 mln manat, dövlət idarəetməsi, müdafiə və sosial təminata – 857 mln manat və s. yönəldilib. 

Xarici investisiyaların 87,7%-i (2,9 mlrd) 7 ölkənin payına düşür (Britaniya, ABŞ, Norveç, Türkiyə, Fransa, Yaponiya və Çexiya).

Vətəndaşların vəsaitləri də nəzərə alınmaqla mənzil tikintisinə 1 mlrd manat qoyulub. 

İlin əvvəlindən 1 724 min m2 mənzil, 27 min yerlik məktəb, 1751 yerlik məktəbəqədər müəssisə, 864 yerlik klub, 1050 çarpayılıq xəstəxana və s. istifadəyə verilib. --08D--