Qiymətli kağızlar üzrə təlimlər başlanır

Kapital Bazarları üzrə Təlim Mərkəzi (KBTM) aprelin 7-də ilk ixtisaslaşmış təlimə başlayacaq. On dərsdən ibarət olan ödənişli “Universal treyder” təlim proqramı birja bazarında həm yeni başlayanlar, həm də təcrübəli treyderlər üçün nəzərdə tutulub.

Təlim 10 dəsrdən ibarətdir. Hər dərsin müddəti 1 saatdır. Təlim materialları Mərkəz tərəfindən təmin olunacaqdır. Təlimin sonunda test təşkil olunacaq. Testi uğurla bitirən tələbələr müvəfəqiyyət sertifikatı ilə təmin olunacaqlar.

Təlim mərkəzində Turan-a bildiriblər ki, təlimlərdən məqsəd bazara daxil olan yeni treyderlərə valyuta birjası haqqında ilkin və orta səviyyəli məlumatlar vermək və onlarda bu birjada peşəkar səviyyədə iştirakı şərtləndirən bacarıqları aşılamaqdır. Təlimdə iştirak valyuta bazarında təcrübəsiz olan treyderləri savadsız ticarətdən və bundan əmələ gələn pul itkilərindən qorumağa imkanı yaradacaq.

Mərkəzin direktoru Cəmilə Məmmədova Turan-a deyib ki, may ayında tələbələr üçün dənişsiz təlimlər keçiriləcək. Təlimlərdə universitetlərin maliyyə yönümlü fakültələrinin tələbələri, eləcə də kapital bazarına maraq göstərən şəxslər iştirak edəcəklər.

Bu ilin martında rəsmi açılışı olan mərkəzdə aprel ayında korporativ maliyyə, törəmə alətlər, maliyyə təhlili, Elliot dalğa nəzəriyyəsi mövzularında müxtəlif səviyyəli təlim proqramlarının təşkil olunması planlaşdırılır. Ümumiyyətlə isə mərkəzdə 20-dək təlim proqramı hazırlanıb. KBTM-də güman edirlər ki, təlim proqramlarını ən yüksək səviyyədə təqdim edilməsi Azərbaycanın qiymətli kağızlar bazarının intensiv və savadlı inkişafını stimullaşdıracaq.

Azərbaycan şirkətləri üçün mərkəzin təqdim etdiyi korporativ kapitallaşma təlim proqramı maraqlı ola bilər. Belə ki, bu proqram çərçivəsində Azərbaycandakı şirkətlərə kapitallaşma yolları, o cümlədən, səhmdar kapital və borclanmanın üstünlükləri, onlara qatacağı dəyər və korporativləşmədəki rolu izah ediləcək. Bundan başqa, yerli şirkətlərə investisiya şirkətləri vasitəsilə kross-listinq imkanı yaradaraq həm yerli, həm də xarici kapital cəlb etmə yolları göstəriləcək.

Dünya Bankının “Kapital bazarlarının müasirləşdirilməsi” layihəsi çərçivəsində yaradılan KBTM qeyri-kommersiya təşkilatıdır və Qiymətli Kağızlar üzrə Dövlət Komitəsinin nəzdində fəaliyyət göstərir. Yerli “İnvestAZ” broker şirkəti onun investoru və tərəfdaşıdır. 08D