RİTN nəzdində Elektron Təhlükəsizlik Mərkəzinin Əsasnaməsi təsdiq edilib

Rabitə və İnformasiya Texnologiyaları Nazirliyi nəzdində ötən il sentyabrın 26-da yaradılmış Elektron Təhlükəsizlik Mərkəzi yaxın günlərdə tam gücü ilə fəaliyyətə başlayacaq.

Ölkə prezidenti 5 mart Fərmanı ilə təşkilatın fəaliyyəti haqqında Əsasnaməni təsdiq edərək, Nazirlər Kabinetinə onun inkişafının əsas parametrlərini və infrastrukturunu təmin etməyi tapşırıb.

Əsasnamədə (http://president.az/articles/7519) RİTN Elektron Təhlükəsizlik Mərkəzinin fəaliyyətinin aşağıdakı istiqamətlərini nəzərdə tutur:

- proqram təminatına, kompüter avadanlıqlarına, informasiya sistemlərinə və şəbəkələrə elektron təhlükələr haqqında informasiya yığılması və təhlili

- informasiya infrastrukturu subyektlərinin kibernetika təhlükəsizliyi sahəsində faəliyyətinin əlaqələndirilməsi

- elektron təhlükələr haqqında xəbərdarlıq, kibernetika təhlükəsizliyi məsələləri üzrə maarifləndirici və təbliğat fəaliyyəti

- proqram təminatının, texniki vasitələrin, təlimatların və tövsiyələrin hazırlanması, habelə elektron təhlükələrə qarşı mübarizə üzrə metodiki dəstək göstərilməsi

- Milli İnternet operatoru və Rabitə Nazirliyi ilə birgə virtual hücumların qarşısının alınması üzrə preventiv tədbirlər

Mərkəz elmi-araşdırma və təhsil müəssisələrinin, şirkətlərin, müstəqil ekspertlərin və mütəxəssislərin cəlb edilməsi ilə işçi qruplar və komissiyalar yaratmaq səlahiyyəti daşıyır.

Mərkəz Rabitə Nazirliyinin qurumu olduğu üçün yeni təşkilatın strukturunu və ştat cədvəlini nazirlik müəyyən edəcək.

Mərkəzin Rabitə Nazirliyi tərəfindən təyin edilən direktoru və onun müavini olacaq. Təşkilatın maliyyə hesabatları həm Rabitə Nazirliyinə, həm də maliyyə orqanlarına daxil olacaq. -17D-