Sabah Bakıda ətraf mühitin qorunması üzrə sərgi açılacaq

Noyabrın 21-dən 23-ə qədər Bakı Ekspo Mərkəzdə “Xəzər: Ətraf  Mühit üçün Texnologiyalar” CTE 2012 Beynəlxalq Ətraf Mühit Sərgisi keçiriləcək. Onu Ekologiya və Təbii Sərvətlər Nazirliyi təşkil edir. 

Bu gün Iteca Caspian sərgi şirkəti və onun tərəfdaşı ITE Group plc sərginin açılışına həsr olunmuş mətbuat konfransı keçirib. Sərgidə məqsəd Azərbaycanda innovasiyalı təbiəti mühafizə avadanlıq və texnologiyaların tətbiqidir. Onlar təbii resursları qorumağa, əhalinin həyat keyfiyyətini yüksəltməyə kömək edəcək, deyə Iteca Caspian-ın baş direktoru Edvard Stroon bildirib.

Ekologiya və təbii sərvətlər nazirinin müavini Firdovsi Əliyev deyib ki, sərgi ətraf mühitin qorunmasında yeni texnologiyalara çıxış üçün yeni imkanlar açır. 

СТE 2012-də Azərbaycan, Almaniya, Belçika, İsrail, Türkiyə, Fransa, və digər ölkələrdən 60 şirkət iştirak edəcək. İştirakçılar sırasında ARDNŞ, BP, Saipem kimi neft-qaz sektorunun aparıcı şirkətləri var. Onlar təbii resurslardan səmərəli istifadə sahəsində ən yeni ixtiraları, habelə karbohidrogenlərin hasilatı və emalı zamanı şəhər əhalisinin maksimal ekoloji təhlükəsizliyinin təmin olunması üzrə investisiya layihələrini təqdim edəcəklər. Sərgiyə ilk dəfə qatılan yeni şirkətər iştirakçıların ümumi sayının 30 faizini təşkil edir. 

Sərginin ekspozisiyasında təbii ehtiyatlardan səmərəli istifadə, bərpa olunan resurslar üzrə tədqiqatlar, zibil emalı zavodu, alternativ energetika üzrə avadanlıqlar təqdim ediləcək. Suyun təmizlənərək içməli hala salınmasına sərgidə xüsusi diqqət veriləcək. İlk dəfə sərgi çərçivəsində pozulmuş dəniz ekosistemlərinin bərpası üzrə texnologiyalara yer ayrılır.