Sahibkar Nəqliyyat Nazirliyində korrupsiya mexanizmindən prezidentə şikayət edib

Bakıda sərnişindaşıma ilə məşğul olan bir qrup sahibkar prezident İlham Əliyevə müraciət edib. Müraciətdə qeyd olunur ki, onlar Nəqliyyat Nazirliyi yanında Nəqliyyat Departamentinin korrupsiya mexanizminin qurbanı olublar.

Müraciətin surəti Heydər Əliyev Fondunun prezidenti Mehriban Əliyevaya, Prezident Administrasiyası hüquq-mühafizə orqanları ilə iş şöbəsinin rəhbəri Fuad Ələsgərova, baş prokuror Zahid Qaralova göndərilib.

“Uğurlu” MMC-nin təsisçisi və direktoru Adil Nəcəfov başda olmaqla sahibkarların Turan-a təqdim etdiyi müraciətdə departament əməkdaşlarının adları, müxtəlif  icazələrə görə ödədikləri məbləğ ətraflı şəkildə göstərlib.

Müraciətə görə, sahibkarlar Nəqliyyat Nazirliyi tərəfindən müxtəlif səviyyələrdə sistematik pul toplanmasından və onun sərnişindaşımanın həyata keçirilməsi hüququndan qanunsuz məhrum edilməsindən şikayətlənirlər.

A.Nəcəfovun sözlərinə görə, sərnişindaşıma sahəsində fəaliyyətə 2004-cü ildə Günəşli qəsəbəsindən “Neftçilər” metro stansiyasına qədər hərəkət edən 247 saylı marşrutdan başlayıb. 

2009-cu ildə onun avtobusları 2 saylı marşrut (“Əhmədli” metro stansiyası- Tibb Universiteti) üzrə hərəkət edib, 2010-cu ildə 110 saylı marşrutu (M.Hadi küçəsi- “Ulduz” metro stansiyası) götürüb.

“Sərnişindaşımada mikroavtobuslardan istifadə qadağa  edildikdən sonra mən böyük tutumlu 3 avtobus və orta tutumlu 11 avtobus üçün lizinq almalı oldum. Hər avtobusa icazə almaqdan ötrü Departament əməkdaşlarına rüşvət kimi 4 min manat vermişəm. Mənə bildirdilər ki,  hər avtobusa görə departament əməkdaşına ayda 350 manat, dispetçerə isə 90 manat ödəməliyəm. Bununla yanaşı hər ay müxtəlif bəhanələrlə məndən əlavə pul  tələb edirdilər. Bu sistem üzrə 2010-cu ildən 2012-ci ilin fevralına kimi işlədim”, - müraciətdə qeyd olunur.

A.Nəcəfov söyləyir ki, 2012-ci ildə ona bildiriblər ki, Bakıda “Eurovision”un keçirilməsilə əlaqədar orta tutumlu 11 avtobusda sərnişindaşımanı dayandırmaq lazımdır. Bunun əvəzində isə “SAZ 37 NP” markalı avtobus almaq lazımdır. Əks halda müqavilənin ləğvilə hədələyiblər.

Müraciətdə sahibkar Departament əməkdaşlarının tələbilə rüşvət kimi verdiyi məbləği açıqlayır.

O, öz müraciətində onu da bildirir ki, 2015-ci ilin əvvəlində Departament əməkdaşları ondan tələb ediblər ki, hər gün ölkə prezidentinə və İqtisadi İnkişaf Nazirliyinə (indiki İqtisadiyyat Nazirliyi – red.) müraciət edərək şəhər nəqliyyatında gediş haqqının artırılmasını xahiş etsin.

Sahibkar bildirib ki, 2015-ci il martın əvvəlində ona dəyən zərərlə əlaqədar öz fəaliyyətini dayandırmalı olub.

Sonra o, öz müraciətində bu məsələni araşdırmaq istəməyən prokurorluq əməkdaşlarından prezidentə şikayət edir.

A.Nəcəfov bildirib ki, bir neçə dəfə Azərbaycan Baş Prokurorluğu yanında Korrupsiyaya Qarşı Mübarizə İdarəsinə müraciət edib.

Onun sözlərinə görə, “Avtomobil nəqliyyatı ilə daşımaların təşkili” MMC 2016-cı ilin avqustun 22-də  onun müraciətlərindən yalnız birinə cavab verib.

Cavabda qeyd olunur ki, MMC-də onun Baş Prokurorluq yanında Korrupsiyaya Qarşı Mübarizə İdarəsinə göndərdiyi müraciətinə baxılıb. Xatırladılıb ki, prezidentin 1 fevral 2006-cı il sərəncamına əsasən mikroavtobuslar böyük tutumlu avtobuslarla əvəzlənib.

Məktubda qeyd olunur ki, yeni tələblərə cavab verməyən sahibkarların fəaliyyəti dayandırlıb.

A.Nəcəfov özü isə bu cavabı başdansovdu və məsuliyyətdən yayınma cəhdi hesab edir.

“Onlar cavabda arqument kimi prezidentin 2006-cı  il tarixli sərəncamını göstərirlər və mikroavtobuslardan danışırlar. Mən 2010-cu ildən sonrakı dövrlə bağlı şikayət edirəm, biz o zaman artıq mikroavtobuslardan istifadə etmirdik”, - o vurğulayıb.

Turan  A.Nəcəfovun ondan çox müraciətinin Baş Prokurorluq tərəfindən onlayn qeydiyyatı sisteminin monitorinqini keçirib. Nəticələr göstərib ki, 2016-cı ilin martında verilən ərizə baxılmaq üçün Bakı Şəhər Prokurorluğuna göndərilib. İdarəyə 2016-cı ilin iyun və avqustunda göndərilən müraciətlər isə icraat mərhələsindədir.–73В-