SOCAR Benində terminal tikintisi imkanına baxır

SOCAR Beninin Kotonu limanında terminalın inşası, eləcə də Qərbi Afrikada bir sıra infrastruktur layihələrinin həyata keçirilməsi imkanına baxır, deyə şirkət məlumat yayıb.

Məlumata əsasən, energetika naziri Natiq Əliyevin rəhbərlik etdiyi nümayəndə heyəti Burkina Faso və Benin hökumətlərinin dəvəti ilə bu ölkələrdə rəsmi səfərdədir.

Səfər çərçivəsində keçirilən görüşlərdə Azərbaycanla adı çəkilən Qərbi Afrika ölkələrinin yanacaq-enerji kompleksləri arasında birbaşa əlaqələrin qurulması və qarşılıqlı iqtisadı əməkdaşlığın təmin edilməsi məsələləri müzakirə olunur.

“ SOCAR-ın sərmayələr və marketinq üzrə vitse-prezidenti Elşad Nəsirov, “Azərikimya” İstehsalat Birliyi Müşahidə Şurasının sədri Muxtar Babayev, “SOCAR Trading” şirkətinin baş icraçı direktoru Arzu Əzimovun daxil olduğu nümayəndə heyəti noyabrın 13-də Burkina Fasonun prezidenti Rok Mark Kristian Kabore tərəfindən qəbul edilib. Xarici işlər və energetika nazirlərinin də iştirak etdiyi görüşdə ikitərəfli münasibətlərin inkişafı diqqət mərkəzində olmuş və səfərin bu sahədə mühüm rol oynadığı vurğulanıb.

Noyabrın 14-də baş nazir Paul Kaba Thieba ilə keçirilən görüşdə SOCAR və Burkina Fasonun “Sonabhy” dövlət neft şirkəti arasında əməkdaşlığa dair konkret layihələr, bu ölkəyə neft məhsullarının tədarükü, qonşu Beninin Kotonu limanında SOCAR tərəfindən terminalın inşası və bir sıra infrastruktur layihələri müzakirə olunub. Müzakirələrdə “SOCAR Trading” şirkətinin rəhbər şəxslərindən Jan-Fransua Piaçentini və Alexandre Asso da iştirak ediblər”, deyə məlumatda bildirilir.

Bu gün nümayəndə heyəti Beninin Kotonu şəhərində energetika, su ehtiyatları və mədən sənayesi naziri, maliyyə naziri, xarici işlər naziri və Beninin SONACOP dövlət neft şirkətinin rəhbər şəxsləri ilə işgüzar görüşlər keçirib. –12D--