S.Şərifov: Valyuta bazarında panika keçdi

Azərbaycanın xarici borclara ehtiyacı var, amma buna kəskin zərurət yoxdur, deyə maliyyə naziri Samir Şərifov AzTV-yə müsahibəsində bildirib. O, Qərb KİV-lərinin Bakının BVF və DB-dən 4 mlrd. dollar borc götürmək planları haqqında yaydığı məlumatları təsdiq etməyib.

Onun sözlərinə görə, söhbət BMT-nin iqtisadi sahədə tədbirlər üçün texniki köməyindən gedir. "Biz beynəlxalq ekspertlərlə məsləhətləşmələri faydalı hesab edirik. Məhz bu səbəbdən AİB, DB və BVF missiyaları Bakıdadır", deyə Şərifov bildirib.

O, "təcili qaydada" kredit cəlb edilməsi zərurəti olmadığını qeyd edib. Bununla belə, etiraf edib ki, "zərurət olarsa" Azərbaycan sözügedən qurumlara kredit üçün də müraciət edə bilər. Amma bu gün buna "kəskin ehtiyac yoxdur", belə ki, ölkənin strateji valyuta ehtiyatları kifayət qədər yüksəkdir. 2016-cı il yanvarın 1-nə olan məlumata görə, Dövlət Neft Fondunun aktivləri ötən ilin əvvəli ilə müqayisədə (37.1 mlrd. dollar) 6.38% azalaraq, 34.74 mlrd. dollar təşkil edib.

İlin əvvəlinə Mərkəzi Bankın valyuta ehtiyatları 5 mlrd. 016,7 mln. dollar təşkil edib (2015-ci ilin əvvəlində 8 mlrd. 741,6 mln., 63,5% azalma).

Şərifov həmçinin Azərbaycanın valyuta bazarında vəziyyətin sabitləşdiyini bildirib. "Yanvarın əvvəllərində bazarda müşahidə olunan panika aradan qalxıb və görülmüş tədbirlər nəticəsində vəziyyət sabitləşib.  Üzən məzənnəyə keçid baş tutub və manatın məzənnəsi ucuzlaşır. Lakin müəyyən məqamda o, bahalaşa da bilər.  Bundan sonra tələb təklifdən asılı olacaq", deyə Şərifov bildirib. -06D-