Tariflərin artırılması fonunda su istehlakı azalır

Bakı/05.09.17/Turan: Bakının bəzi yaşayış məntəqələrində (Abşeron və Sumqayıt da daxil olmaqla), eləcə də digər şəhər və rayonlarda adamlar yaz mövsümünün başa çatmasını səbirsizliklə gözləyirlər. Istilər səngidikdən sonra, nəhayət, onların mənzillərinə soyuq su nisbətən yüksək axın ilə gəlir. Amma elə ailələr var ki, hökumət 2016-cı ilin mayında suyun tariflərini 38% artırdıqdan sonra suya qənaət etməyə məcburdur. Belə ailələrin sayı çoxdur.

Dövlət Statistika Komitəsinin məlumatına görə, bu ilin yeddi ayı ərzində su təchizatı və kanalizasiya xidmətləri üzrə dövlət inhisarçısı əhalini və digər istehlakçı qrupları 125,6 milyon kubmetr su ilə təmin edib. Bu, ötən ilin eyni dövründə olduğundan 20,2 milyon kubmetr və ya 13,9% faiz azdır.

Ciddi qəzalar və su təchizatı məhdudiyyətləri rəsmi olaraq bildirilməyib. Su satışının həcmi, çirkab sularının təmizlənməsi 169,7 milyon manat təşkil edib.

Mövcud qiymətlərlə bu 2016-cı ilin yanvar-iyul aylarına nisbətən 19,8% çoxdur. Lakin stabil qiymətlərdə, yəni tarif artımını nəzərə almadan gəlirlər 1,1% azalıb.

Su təchizatı kommunal xidmətlərin yeganə sahəsidir ki, burada tədarükçü və istehlakçı arasında maliyyə münasibətləri indiyədək tam şəkildə tənzimlənməyib.

İstehlakçıların təxminən üçdə biri (445 min abunəçi), o cümlədən kommersiya hüquqi şəxslər suyu sayğaca görə almır.

Yerli ekspertlərin fikrincə, bu, "Azərsu" ASC sistemində korrupsiya üçün əlverişli şərait yaradır.

Turan İnformasiya agentliyinin məhkəmə prosesləri ilə müşayiət edilən araşdırmaları su sayğaclarının alınması və quraşdırılması zamanı korrupsiya faktlarının olduğunu aşkarlayıb.

Məlum olub ki, 2016-cı ildə bir sayğac 240 manata alınıb və quraşdırılıb ki, bu da həmin məhsul və xidmət üçün real qiymətdən bir neçə dəfə çoxdur.

"Azərsu" ASC 2016-cı il üçün maliyyə hesabatını açıqlamır və 2017-ci ilin yanvar-avqust aylarında quraşdırılan su sayğacları barədə məlumat vermir.

Su şirkətində bununla bağlı Turan IA-nın sorğusuna cavab vermirlər. 08B