Tehranda Azərbaycan, İran və Gürcüstan dəmir yollarının rəhbərləri görüşüb

Bu il noyabrın sonunadək Deutsche Bahn şirkəti (AFR) 41 konteynerdən ibarət test qatarını “Cənub-Qərb” marşrutu üzrə göndərəcək.

Qərar Tehranda Azərbaycan, İran, Gürcüstan dəmir yollarının rəhbərləri və “Deutsche Bahn” (DB) şirkətinin icraçı direktoru Andre Hempelin görüşündə qəbul edilib. Azərbaycan nümayəndə heyətinə “Azərbaycan Dəmir Yolları” QSC-nin rəhbəri Cavid Qurbanov başçılıq edir.  Bu barədə Turan-a qurumun mətbuat xidmətindən bildirilıb.

Test qatarı, Rumıniyanın Konstanta limanından yola salınacaq və Tehrana 8 gün ərzində çatacaq. Konteynerlər Konstanta limanından gəmi ilə Gürcüstan limanına nəql edilərək, oradan dəmir yolu ilə Azərbaycanın Astara stansiyasına, Astaradan yük avtomobilləri ilə İranın Qəzvin stansiyasına yola salınacaq və oradan yenidən dəmir yolu vasitəsilə Tehrana çatdırılacaq.  

Görüş iştirakçıları “Cənub-Qərb” beynəlxalq nəqliyyat dəhlizinin inkişaf perspektivlərini müzakirə ediblər, həmin marşrutla Hindistan və İran körfəzi ölkələrindən Avropaya və əks istiqamətdə yükdaşımaların həyata keçirilməsi mexanizmi ətrafında fikir mübadiləsi aparıblar.

Görüşdə qeyd olunub ki, “Cənub-Qərb” dəhlizi qeyd olunan istiqamətdə yüklərin nəql edilməsi üçün ən əlverişli marşrutdur.  Almaniya şirkəti Avropadan irana, İran körfəzi ölkələri və Hindistana yüklərin nəql edilməsi zamanı bu marşrutdan istifadə edilməsində maraqlı olduqlarıını bildiriblər.

Səfər zamanı “Azərbaycan Dəmir Yolları” QSC-nin sədri Cavid Qurbanov İran Dəmir Yolunun baş direktoru Mohsen Purseyid Ağayi görüşündə  Astara (Azərbaycan) – Astara (İran) stansiyaları arasında dəmir yolunun və iki ölkə sərhəddində Astaraçay üzərində inşa edilən dəmir yol körpüsünün tikintisi ilə bağlı  məlumat verib. Eyni zamanda İran tərəfi Astara stansiyasında inşa edilən yük terminalının texniki imkanlarını təqdim edib. 08D