Vergilər Nazirliyi «Risklərin vahid mərkəzdən idarə edilməsi» alətinin tətbiqinə başlayıb

Vergilər Nazirliyi “Risklərin vahid mərkəzdən idarə edilməsi” alətinin tətbiqinə başlayıb. Onun mahiyyəti müasir informasiya texnologiyalarından istifadə etməklə vergidən yayınma faktlarının aşkarlanması, elektron qayda vasitəsilə vergi nəzarətinin həyata keçirilməsi, vergi potensialının hərtərəfli qiymətləndirilməsindən ibarətdir.

Vergilər Nazirliyinin analitik-informasiya şöbəsindən Turan-a bildirilib ki, bu alət  vergidən yayınan və ya qanunvericiliyin tələblərinə əməl etməyən riskli vergi ödəyicilərinin müəyyənləşdirilməsi üçün səmərəli mexanizm olaraq təyin ediləcək vergi yoxlamaların tam əsaslandırılmasına, vergi orqanlarının inzibati və insan resurslarından daha səmərəli istifadə edilməsinə, vergidən yayınan vergi ödəyicilərinin vaxtında aşkar olunmasına imkan verəcək.

“Risklərin idarə edilməsi” aləti vasitəsilə aşkar edilmiş risk üzrə, hər şeydən əvvəl, onun dürüstlüyü qiymətləndirilməklə, mövcud potensial vergitutma baxımından dəyərləndirilir. Bundan sonra aşkar edilmiş vergidənyayınma halının növünə uyğun olaraq 3 növ (kameral vergi yoxlaması, səyyar vergi yoxlaması və ya operativ vergi nəzarəti tədbiri) vergi nəzarəti tədbirindən biri seçilir və onun icrası avtomatik olaraq həmin alət vasitəsi ilə qeydiyyat prinsipi nəzərə alınmaqla müvafiq vergi orqanına həvalə edilir. 08D