Xəzər Dəniz Gəmiçiliyinin nizamnaməsi və strukturu təqsdiq edilib

Nazirlər Kabineti 24 yanvarda "Azərbaycan Xəzər Dəniz Gəmiçiliyi" QSC-nin nizamnaməsi və strukturunu təqsdiq edib. 

Gəmiçiliyin nizamnamə kapitalı nominalı 1 manat olan 383 420 621 səhmdən ibarətdir. Bütün səhmlər dövlətə məxsusdur. Maliyyə hesabatı və konsolidə edilmiş maliyyə hesabatları beynəlxalq standartlara uyğun hazırlanır. Şəffalıq tələbatı üzrə tələblər də müəyyən edilib: auditor rəyi ilə müşayiət edilən illik maliyyə hesabatları, xalis aktivlərin 25%-i keçən məbləğ üzrə əqdlər nəzərdə tutulan müddətdə mətbuatda açıqlanmalıdır. Gəmiçilik xalis mənfəətdən istifadə edə bilər. 

Cəmiyyətin İH-nin üzvü olan 7 nəfəri dövlət başçısı təyin və azad edir. Cəmiyyətin yenidən təşkilatlanması və ləğvi qərarını da o qəbul edir. 

Cəmiyyət daxili audit formalaşdırır. Əməkdaşlar ali iqtisadi və hüquq təhsilli, 4 il stajlı olmalıdır. 

QSC-nin strukturuna mərkəzi aparat və 3 törəmə müəssisə daxildir (Azərbaycan Dövlət Dəniz Akademiyası; "Dənizçi" yardımçı kənd təsərrüfatı müəssisəsi; Xəzər Dəniz Nəqliyyat Layihə-Axtarış və Elmi-Tədqiqat İnstitutu) Gəmiçiliyin Xəzəryanı ölkələrdə, Türkiyə və Ukraynada nümayəndiliyi var. "Azərbaycan Xəzər Dəniz Gəmiçiliyi" Qapalı Səhmdar Cəmiyyətinin tabeliyində olan hüquqi şəxs statusuna malik olmayan təşkilatlar (idarələr):

1. Dəniz Nəqliyyat Donanması; 2. Xəzər Dəniz Neft Donanması; 3. "Bibiheybət" Gəmi Təmiri Zavodu; 4. "Zığ" Gəmi Təmiri Zavodu; 5. İstehsalat Xidmətləri İdarəsi; 6. Sosial İnkişaf İdarəsi.

Xəzər Dəniz Gəmiçiliyinin flotiliyası 488 min ton yükqaldırma gücündə olan 82 gəmidən ibarətdir: 43 tanker, 39 quru yük gəmisi (7 dəmir yolu bərəsi).  Xəzər Dəniz Neft flotiliyası 263 gəmidən ibarətdir.  

Prezident İlham Əliyev 10 yanvar 2014-cü ildə mətbuatda verilməyən №213 «”Xəzər Dəniz Gəmiçiliyi” QSC-nin fəaliyyətinin təşkili haqqında» sərəncam imzalayıb.

2013-cü ildə  «Xəzər Dəniz Gəmiçiliyi” QSC-nin gəmiləri Xəzərdə 11,5 mln ton yük, o cümlədən 56,4% neft daşıyıb.--08D--