Yaşayış minimumu rəsmi göstəricidən dəfələrlə fərqlənir

İqtisadi Tədqiqatlar Mərkəzinin (İTM) Turan agentliyinə təqdim etdiyi alternativ hesablamaya görə, oktyabr ayında yaşayış minumunun dəyəri əmək qabiliyyətli əhali üçün 253,4 manat, pensiyaçılar üçün 199,9 manat, uşaqlar üçün 259,9 manat olub.

Hesablamalar göstərir ki, 1 uşaqlı ailənin aylıq yaşayışının minimum dəyəri 766,7manat, 2 uşaqlı ailənin aylıq yaşayşının minumum dəyəri 1026,6 manat təşkil edir.

Rəsmi açıqlamalara görə, 2017-ci il yanvarın 1-dən yaşayış minimumu ölkə üzrə 155 manat, əmək qabiliyyətli əhali üçün 164,5 manat, pensiyaçılar üçün 130,2 manat, uşaqlar üçün 136,6 manat məbləğində müəyyən ediləcək.

Rəsmi rəqəmlərin reallığını yoxlamaq üçün İqtisadi Tədqiqatlar Mərkəzinin (İTM) ekspertləri tərəfindən Azərbaycan Respublikası Nazirlər Kabinetinin 2014-cü il 6 iyun tarixli 182 nömrəli qərarı ilə təsdiq edilmiş "Azərbaycan Respublikasında minimum istehlak səbətinin tərkibi" nə daxil olan ərzaq, qeyri-ərzaq və xidmətlər üzrə yaşayış minumunun dəyəri hesablanıb.

Göründüyü kimi, alternativ hesablamaya görə, real yaşayış minumunun gerçək dəyəri rəsmi göstəricidən əmək qabiliyyətli əhali qrupu üzrə 88,9 manat və 35,1 faiz çox, pensiyaçılar qrupu üzrə 69,7 manat və ya 34,9 faiz, uşaqlar üçün 123,3 manat və ya 47,5 faiz - çoxdur.

İTM müəyyən edib ki, ərzaq məhsullarına yönələn xərclərin əmək qabiliyyətli əhali üçün yaşayış minumunun dəyərində payı 58 faiz, pensiyaçılar üçün yaşayış minumunun dəyərində payı 67 faiz, uşaqlar üçün yaşayış minumunun dəyərində payı 61 faiz təşkil edib. Daha sürətlə artan ərzaq məhsullarının qiymətlərinin getdikcə yaşayış minumunun dəyərini daha da artıracağı gözlənilir.  71D