Yem bahalandığı üçüün ət də bahalanacaq

Bakı/09.10.17/Turan: Ekspertlər yaxın vaxtlarda ətin kəskin bahalaşacağını proqnozlaşdırır. Bu vacib məhsulun qiymət artımı yem bazasının azalması ilə bağlıdır. Çünki təbii otlaqlar pambıq əkini sahələrinə çevrilir.

Əldə olan məlumata görə, bir sıra regionlarda kənd əhalisi otlaqlar olmadığı üçün çətinliklərlə üzləşib. Bundan başqa, bu il pambıq əkini sahələri 136 min hektaradək genişləndirilib. Yemin qiyməti də dəfələrlə artıb. "Bir tay otun qiyməti 1,20 manatdan 4 manata, yəni üç dəfədən çox bahalanıb və bu amil ət-süd məhsulunun azı 20% bahalanmasına səbəb olacaq",- deyə "Exo" nəşri iqtisadçı Natiq Cəfərlyə istinadən bildirir.

O cümlədən qeyd edilir ki, fermerlər quşlar üçün idxal edilən yemin ƏDV-dən azad edilməsi barədə hökumətə müraciət hazırlayır. Çünki əks təqdirdə quş əti bahalanacaq, - deyə nəşr məlumat verir.

Mütəxəssislərin məlumatına görə, bir sıra fermer təsərrüfatlarında pambıq becərilməsi könüllü deyil, bir çox hallarda kəndlilər bu təşəbbüsə müqavimət göstərir. Belə ki, Azad İstehlakçılar Birliyinin sədri Eyyub Hüseynovun məlumatına görə, Sabirabad kəndliləri ona müraciət edərək bildiriblər ki, ərazidə suvarma sistemi olmamasına baxmayaraq, məmurlar onları pambıq əkməyə məcbur edir. Nəticədə torpaq sahələri otlaq üçün yararsızdır, pambıq məhsulu isə böyük sual altındadır.

Azərbaycan əvvəllər də ət-süd məhsullarına tələbatı ödəməyib. "Ölkədə əhalinin tələbatını təmin edəcək qədər kənd təsərrüfatı məhsulları istehsal edilmir. Ət və südə olan tələbatın 38%, yumurtaya olan tələbatın 60% və toyuq ətinə olan tələbatın 35 %-i təmin edilir", - deyə kənd təsərrüfatı üzrə ekspert Vahid Məhərrəmov bahalanmanı proqnozlaşdıraraq bildirib.

Yem bazası azaldığı üçün ət və süd istehsalı kəskin şəkildə azalır, yerini idxal mallarına verir, istehlak qiymətləri artır, deyə Məhərrəmov hesab edir. Belə ki, Gömrük Komitəsinin məlumatına görə, bu ilin 8 ayında ət idxalı 28 min 249,8 tonadək artıb. Bu, pul ifadəsində 42 mln 979 min dollar təşkil edir. Müqayisə üçün deyək ki, ötən ilin eyni dövründə ət idxalı 16 min 920.19 ton (20 mln 375.73 min dollar) olub. Süd idxalında da analoji vəziyyət var - bu ilin 8 ayında 8 mln 589.91 min dollar məbləğində 5 min 364.93 ton süd idxal edilib. Halbuki ötən ilin eyni dövründə bu göstərici 5 mln 193 min məbləğində 173 min 479.27 ton - bir dəfə yarım az idi.-0-