Yolkalar, bər-bəzəklər və s.

Dekabrda ən çox tələbat olan məhsul yeni il yolkaları oldu.

Mağazalarda və küçələrdə, xüsusən metro stansiyalarının girişlərində müxtəlif keyfiyyət və qiymətli yolkalar satılırdı. Küçələrdə əsasən keyfiyyəti o qədər də yaxşı olmayan Çin yolkaları satılırdı. Onların qiyməti yüksəkliyindən və genişliyindən asılı olaraq 8-150 manat arasında dəyişirdi.

Keyfiyyətli yolkalar xeyli bahalı idi. Məsələn, İtaliya istehsalı olan yolkaların qiyməti 50-450 manat arasında dəyişirdi. Onların keyfiyyəti Çin yolkalarında xeyli yaxşıdır ki, bu da adi gözlə belə nəzərə çarpırdı. Adətən bu yolkalar “Qrafika”, “Ağ çiçəyim” mağazalar şəbəkəsi və s. kimi firma mağazalarında satılırdı.

Yolkanın olduğu yerdə mütləq yolka oyuncaqları da olur. Əlbəttə, bütün oyuncaqları hər il yeniləməyə ehtiyac yoxdur, amma ənənəvi olaraq bir neçə yeni oyuncaq almaq lazım gəldi.

6-12 ədəd oyuncaqdan ibarət yolka dəstinin qiyməti orta hesabla 5-10 manat olub, baxmayaraq ki, 20 manatlıq dəstlərə də rast gəlmək olardı. Yenə də hər şey istehsalçı ölkədən, oyuncağın keyfiyyətindən və ölçüsündən asılı idi. Yolka üçün plastik şarların bir ədədi mərkəzi mağazalarda təxminən 1,5-2,5 manata satılırdı. İçərisində Şaxta Baba olan müxtəlif kürələri və yeni il mövzusunda digər suvenirləri təxminən 5 manatdan 15 manata qədər almaq olardı.

Təbii şüşədən hazırlanan alman oyuncaqları isə kifayət qədər bahalı idi və hər alıcının cibinə uyğun deyildi. Onların bir ədədinin qiyməti 60 manata qədər çatırdı. Satıcıların dediyinə görə, onların əksəriyyəti əl işidir.

Oyuncaq Şaxta Babaların qiyməti 5-20 manat arasında dəyişirdi. Mənzilləri bəzəmək üçün müxtəlif yeni il çələngləri 5-10 manata başa gəlirdi, daha bahalı olanları da var idi.

Yolka mağazası satıcılarından biri olan Ramil Əliyevin Turan-a verdiyi məlumata görə, yeni il qabağı bazarda ən çox zərlər əşyaları satılıb. Onların qiyməti 1 manatdan 10 manata qədər dəyişirdi. “Zərlərdən müxtəlif məqsədlərlə istifadə olunur. Onlarla geyimi, otaqları və təbii ki, yolkanı bəzəmək olar. Yəqin ki, elə bu səbəbdən insalar ən çox onu alırdı”, deyə Əliyev qeyd edib.

Lakin tələbata baxmayaraq, yolka mağazalarının satıcılarınını kefi kök deyildi. Ramilin sözlərinə görə, küçədə yeni il qabağı 15 kv. metrlik ticarət nöqtəsi üçün icra hakimiyyəti nümayəndələrinə qeyri-rəsmi olaraq 500 manat ödəyib. “Korrupsiya olmasaydı yolka oyuncaqları daha ucuz olardı”, deyə o qeyd edib.

Yerin qiyməti də mövqeyindən asılı olaraq dəyişir. Dekabrın 17-dən yanvarın 13-nə qədər müddət ərzində şəhərin mərkəzində belə yerlər 800-1000 manat, Yasamal rayonunda 500-600 manat, Əhmədlidə isə 200-300 manat arasında dəyişir.

2013-cü il başladıqdan sonra yolka və digər aksessuarların qiymətləri ucuzlaşmağa başladı və indi onları növbəti yeni il bayramı üçün 20-50% ucuz almaq olar. Alış-veriş etməyə dəyər, zaman qısadır. -0-