İstanbulda Nəsiminin 650 illiyinə həsr edilmiş rəsm sərgisi açılıb

Turan agentliyinin məlumatına görə,İstanbuldakı Yeditepe universitetində böyük Azərbaycan şairi İmadəddin Nəsiminin anadan olmasının  650 illiyinə həsr edilmiş rəsm sərgisi  açılıb.

Sərgi Azərbaycan Respublikasının prezidenti İlham Əliyevin Nəsiminin anadan olmasının 650 illiyi ilə bağlı 15 noyabr 2018-ci ildə verdiyi sərəncama əsasən təşkil edilib.

Sərginin təşkilatçıları Yeditepe universitenin professoru,Azərbaycanın tanınmış rəssamı Rafiq Əziz və Rusiyanın  Yeni planetariy TV kanalının sahibi Mariya Karpinskayadır.

Azərbaycan,Türkiyə,Rusiya,İtaliya və b. ölkələrdən təxminən 300  uşaq və yeniyetmənin əl işlərinin nümayiş etdirildiyi “Dünya uşaqların  gözüylə” sərgisinin açılış mərasimində Yeditepe universiteti qurucular heyətinin sədri,İstanbulun keçmiş bələdiyyə sədri,keçmiş millət vəkili Bedrettin Dalan çıxış edərək İmadəddin Nəsiminin dünya ədəbiyyatındakı yeri barədə danışıb.

Sərginin açılış mərasimində Turan agentliyinə açıqlama verən Mariya Karpinskaya deyib :”Uşaq və yeniyetmələrin əl işləri vasitəsiylə Nəsimi kimi söz ustasını xatırlamaq bizim üçün əlamətdar bir hadisədir.Çünki uşaqlar dünyada sülhün simvolları olduqları kimi,Nəsimi də 600 ildən bəri insanlar arasındakı sülhün və humanizmin simvolu kimi dünya ədəbiyyatı tarixində yaşşamaqdadır.”Dünya uşaqların gözü ilə” konsepsiyalı sərgimizi başqa ölkələrdə də davam etdirməyi planlaşdırmışıq”.

Qeyd etmək lazımdır ki,ermənilərin Xocalıda dinc Azərbaycan əhalisinə qarşı törətdikləri soyqırımdan sonra Bakıya  gələn Bedrettin Dalan, valideynləri şəhid olmuş 10 uşağı İstanbula apararaq başqanı olduğu İSTEK Vəqfinin məktəblərində oxudub.

Azərbaycanın tanınmış rəssamı, professor Rafiq Əziz isə Yeditepe universitetinin yaradıldığı 1996-cı ildən bəri orada işləyir.Son sərgi professor Rafiq Əzizin indiyə qədər reallaşdırdığı 98-ci layihədir.