Xocalı faciəsi haqqında sənədli filmin təqdimatı

Ötən gün Londonda Britaniya Kino və Televiziya İncəsənəti Akademiyası Litva kinematoqrafçılarının çəkdiyi “Endless Corridor”  (“Bitməyən dəhliz”) sənədli filminin premyerası olub.

Təqdimatda litvalı prodüser Aleksandr Brokas, amerikalı prodüser Cerald Rafşun, lentin ingilis dilində versiyasını səsləndirən aktyorlar Anna Arçer, İen Qlen  və Ceremi Ayronz iştirak ediblər.

Filmin prodüseri A.Brokas film üzərində 5 ilə yaxın işləyib. Layihədə 15 ölkənin nümayəndələri iştirak ediblər.

Tanınmış amerikalı prodüser C.Rafşun lentin televiziya versiyası üzərindəki işdən danışıb.

Film Xocalı faciəsinin qurbanlarının taleyindən gedir. 20 ildən sonra onlar qarşılaşırlar və həmin dəhşətli günləri yenidən yaşayırlar.

Bu, həm də fevralın 25-dən 26-na keçən gecə Dağlıq Qarabağda baş verənlərin araşdırılmasıdır. Həmin gecə erməni bölmələri Rusiyanın 366-cı alayının dəstəyilə Xocalını işğal ediblər və 600-dən çox dinc sakini öldürüblər.

Filmdə erməni qüvvələrinin komandanı və Qarabağ separatizminin ideoluqunun timsalında  hadisələrlə bağlı erməni versiyası da təqdim olunur. Tamaşaçı özü baş verənlər haqda nəticəyə gələ bilər.

Film Azərbaycan, Ermənistan, Rusiya və Pribaltikada asan olmayan şəraitdə çəkilib. Ermənistanda çəkiliş qrupu Yerevan aeroportunda saxlanılaraq deportasiya edilib. Sonradan erməni tərəfi bildirib ki, litvalılar azərbaycanlıların casuslarıdır. Buna baxmayaraq, müəlliflər bir yol tapıblar və başqa ölkədəki həmkarlaının vasitəsilə çəkilişi ediblər.

Premyeradan sonra “Bitməyən dəhliz” sənədli filminin dünyanın aparıcı televiziya kanallarında nümayişi planlaşdıırlır. -02В-