Yeni kitab: mənəviyyat və maarif problemləri

Bu gün RATİ-nin Media Mərkəzində Kamal Əmirahın “Azərbaycan 21-ci əsrin astanasında. Mənəviyyat və maarif problemləri və onların həlli yolları. Aktual tezislər və islahatlar” kitabının təqdimatı olub. 

Müəllif Kamal Əmirah kibernetika sahəsində alimdir, Azərbaycan Ziyalılar Birliyinin Ali Şurasının üzvüdür.  

Kitab Azərbaycanda mənəviyyatın və maarifin durumundan və problemlərindən bəhs edir. Müəllif həmçinin korrupsioner məmurların mənəvi düşkünlüyünün insan fəaliyyətinin müxtəlif sahələrində törətdiyi problemləri araşdırır. 

“Təəssüflə etiraf etməliyik ki, son onilliklərdə Azərbaycanda subyektiv səbəblər üzündən mənəvi mühit pozulub, əhalinin mənəviyyatı və etikası nəzərəçarpacaq dərəcədə düşüb. Bu  neqativ hal həyatımızın bütün sahələrində dağıdıcı prosseslər, təmayüllər yaradıb. Mövcud vəziyyətin davamı dövlətimizi rəzil və düşkün ölkələr sırasına sürükləyir”, deyə müəllif K.Əmirah qeyd edib. 

Ziyalılar Birliyi də kitabı mövcud problemlərin təhlili və vəziyyətdən çıxışla bağlı təkliflər baxımından əhəmiyyətli hesab edir. 

“Ümid edirik ki, kitab ictimai fikri problemlərin həllinə yönəldə biləcək”, deyə Ziyalılar Birliyinin rəhbəri Eldəniz Quliyev bildirib.   

Təqdimatda təhlilçilər, ictimai xadimlər də iştirak edib. -03C-