ABŞ ATƏT-i Cənubi Qafqazda 3 üstəgəl 3 platformasından üstün tutur

Vaşinqton/24.03.21/Turan: Vaşinqton hesab edir ki, Cənubi Qafqazda regional təhlükəsizliyin təmin edilməsi üçün ən yaxşı razılaşmalar "bundan ötrü yaradılmış təşkilatla həll olunur və bu, ATƏT- dir", - çərşənbə axşamı ABŞ Dövlət Departamentinin yüksək vəzifəli nümayəndəsi bildirib, TURAN-ın müxbiri məlumat verir.

Dövlət katibinin Avropa və Avrasiya işləri üzrə köməkçisinin müavini Corc Kent Senatın beynəlxalq münasibətlər üzrə alt komitəsi qarşısındakı çıxışında deyib ki,  əsrin son dörddə birində Cənubi Qafqazda təhlükəsizlik problemlərinin həlli, Dağlıq Qarabağ, Abxaziya və Cənubi Osetiyada münaqişələrin həlli üçün çərçivə yaradılıb, bu, ATƏT-dir.

"Bu, bütün iştirakçı ölkələrin üzv olduğu, vahid dəyərlərə və proseslərə sadiqliyini bölüşdüyü uyğun bir qurumdur".

Lakin Rusiyanın təklif etdiyi 3 üstəgəl 3 regional platforması "bu dəyərlərdən böyük bir uzaqlaşmadır", - Kent deyib.

"Bu, seçmədir və regional infrastruktura əsaslanır ... Gürcülər narahatdırlar ki, rusiyalıların təklif etdikləri bəzi layihələr faktiki olaraq Gürcüstandan yan keçir – bu, dəmir yolu və avtomobil infrastrukturudur. Necə ki, "Şimal axını" və "Türk Axını" qaz kəmərləri də Ukraynadan yan keçir. Bu, Gürcüstanın həmin platformada gördüyü təhlükədir".

Haqlı olaraq gürcülər də "ərazilərinin 20 faizini işğal etmiş və öz öhdəliklərini yerinə yetirməkdən imtina edən ölkə (Rusiya) ilə danışıqlar masasına oturmaq istəmirlər", -  o əlavə edib.

Kent işarə edib ki, Rusiya qoşunlarının "sülhməramlılar" kimi Dağlıq Qarabağda yerləşdirilməsi o deməkdir ki,  Rusiyanın Cənubi Qafqazın hər üç ölkəsində mövqeyi var. İndi Türkiyə və Rusiya qoşunları Azərbaycanda atəşkəsi müşahidə mərkəzinə birgə rəhbərlik edirlər.

Kentin fikrincə, Rusiya, Türkiyə və İranın təklif etdiyi 3 üstəgəl 3 regional platforması "Rusiya, Türkiyə və İranın regionda təsirini artırmaq üçün bu yeni dinamikadan istifadə etməyə çalışır".

"Hazırda biz ABŞ-ın Cənubi Qafqaz ölkələri arasında - onların suverenliyi və fəaliyyət azadlığı qorunub saxlanılmaqla - daha sıx əməkdaşlığa dəstək verə biləcəyi yolları öyrənirik", - o əlavə edib.

Vaşinqton hesab edir ki, Gürcüstanın Qərb yönümlülüyünün gücləndirilməsi səyləri "Dağlıq Qarabağda ötənilki intensiv hərbi əməliyyatlardan sonra xüsusilə vacibdir". ABŞ-ın Gürcüstanda demokratiyanın möhkəmləndirilməsində və Rusiyanın sabitliyi pozmaqda olan hərəkətlərinə qarşı mübarizədə səylərinə gəlincə, ABŞ diplomatik kanallardan, yardım proqramlarından və ictimai dəstəkdən istifadə edir.

"Gürcüstan Rusiya idarəetmə modelinə əks-nümunə olmaq üçün öz demokratiyasını möhkəmləndirmək üçün işlər görməlidir. Gürcüstanın demokratiya və qanunun aliliyinə sadiqliyi bizim münasibətlər strategiyasının fundamental elementidir", - Kent əlavə edib.

"Gürcüstanda hazırkı siyasi böhran ölkənin demokratik inkişafı və Rusiyanın qərəzli təsiri qarşısında potensial zəifliyi baxımından narahatlıq doğurur. Vaşinqton Gürcüstanın siyasi qüvvələrini siyasi böhrana son qoymaq üçün çətin kompromislərə getməyə çağırır", - Kent əlavə edib. -25B-