ABŞ dövlət katibi Əliyev və Paşinyana münaqişənin nizamanması məsələlərini müzakirə edib

Bakı/26.07.22/Turan: İyulun 25-də ABŞ dövlət katibi Entoni Blinken Azərbaycan prezidenti və Ermənistan baş nazirinə zəng edib.

"Dövlət katibi Antoni Blinken ABŞ-ın Ermənistan ilə Azərbaycan arasında münasibətlərin normallaşdırılmasını dəstəklədiyini qeyd edərək, Tbilisidə iki ölkənin xarici işlər nazirlərinin görüşünü və birbaşa dialoqunu müsbət qiymətləndirdiyini bildirib", deyə Azərbaycan dövlət başçısının mətbuat xidmətinin məlumatında bildirilir.

Öz növbəsində, Əliyev Tbilisidə Azərbaycan və Ermənistan xarici işlər nazirlərinin görüşünün keçirilməsini "iki ölkə arasında sülh müqaviləsi üzrə danışıqların başlanması istiqamətində ilk addım" kimi qiymətləndirib. Əliyev qeyd edib ki, Azərbaycan artıq sülh müqaviləsinin hazırlanması üzrə öz komissiyasının tərkibini formalaşdırıb və Ermənistan tərəfindən də eyni addımın atılmasını gözləyir.

Blinken ABŞ-ın Ermənistan ilə Azərbaycan arasında nəqliyyat bağlantılarının və kommunikasiyaların açılmasına və bu sahədə texniki dəstəyin göstərilməsinə hazır olduğunu ifadə edib.

Humanitar məsələlərə toxunan Əliyev birinci Ermənistan-Azərbaycan müharibəsindən sonra 3890 nəfərdən artıq azərbaycanlının itkin düşmüş şəxs hesab olunduğunu bildirib və Ermənistan tərəfinə dəfələrlə müraciət edilməsinə baxmayaraq, kütləvi məzarlıqların yerləri barədə məlumat verilməməsinə diqqət çəkib.

Bundan başqa, Əliyev Azərbaycanın işğaldan azad olunmuş ərazilərində Ermənistan tərəfindən kütləvi şəkildə minaların basdırıldığını və müharibənin başa çatmasından bəri 240 nəfərdən artıq vətəndaşımızın mina partlayışlarında həlak olduğunu və ya sağlamlığını itirdiyini bildirib, deyə məlumatda qeyd edilir.

Öz növbəsində, Ermənistan tərəfi Blinkenin Paşinyanla söhbəti zamanı da eyni məsələlərə toxunulduğunu bildirir.

Xüsusən, dövlət katibi Bakı və Yerevan arasında Avropa İttifaqının vasitəçilliyi ilə aparılan danışıqları dəstəkləyib. O, həmçinin ABŞ-ın "uzunmüddətli və hərtərəfli sülhə nail olmaq üçün Ermənistana və Azərbaycana kömək etmək məqsədilə ATƏT-in Minsk Qrupundan olan tərəfdaşları ilə əməkdaşlıq etməyə" hazır olduğunu ifadə edib. Baş nazir Paşinyan sülh gündəliyinə sadiqliyini təsdiq edib və Ermənistan ictimaiyyətinin bu kursu dəstəklədiyini vurğulayıb.

ABŞ Dövlət Departamentinin məlumatında deyilir ki, Blinken Əliyevi bütün saxlanılan erməniləri azad etməyə çağırıb.

Dövlət katibi Paşinyanla söhbətində "Ermənistan və Türkiyə arasında münasibətərin normallaşması işində müsbət dinamikaya və əldə olunmuş konkret razılaşmalara görə təşəkkür edib". 0