ABŞ xəbərdarlıq edir: Şimali Koreya qoşunlarının Ukraynaya göndərilməsi "təhlükəli" hadisədir

Bazar ertəsi ABŞ bildirib ki, müharibədə Rusiya tərəfində döyüşmək üçün Şimali Koreya qoşunlarının Ukraynaya göndərilməsi təhlükəli hadisədir.

"Biz məlumatların doğru olub-olmadığını təsdiqləyə bilmərik, lakin əgər  doğrudursa, bu, Rusiyanın Ukraynaya qarşı müharibəsində hadisələrin təhlükəli və olduqca narahatedici inkişafı deməkdir", - Dövlət Departamentinin mətbuat katibinin müavini Vedant Patel brifinqdə Turan-ın sualını cavablandırarkən bildirib.

Həftəsonu həm Ukrayna, həm də Cənubi Koreya öz kəşfiyyat məlumatlarına istinadla bildiriblər ki, Şimali Koreya Rusiyaya dəstək üçün Ukraynaya minlərlə əsgər göndərib.

Patelin sözlərinə görə, bu, həm də "Rusiyanın artan çarəsizliyini göstərir. Ukrayna hərbçilərinin effektivliyinə görə Rusiya hər gün böyük itki verir. Rusiya həqiqətən də işçi qüvvəsi üçün Koreya Xalq Demokratik Respublikasına müraciət etmək məcburiyyətində qalıbsa, bu, mütləq Kremlin çarəsizliyinin əlamətidir", - o deyib.