A.Dezir: Qarabağ münaqişəsi «Madrid prinsipləri» əsasında həll olunmalıdır

Fransa ATƏT-in Minsk qrupunun digər həmsədrləri – ABŞ və Rusiya ilə birlikdə Qarabağ münaqişəsinin “beynəlxalq hüquq normalarına uyğun, Madrid prinsipləri və ərazi bütövlüyünə hörmət əsasında” həllinin tərəfdarıdır. Bu barədə Bakıda keçirilən mətbuat konfransında Fransa XİN-in Avropa məsələləri üzrə dövlət katibi Arlem Dezir bildirib.

Bakıya səfərinin Qarabağda vəziyyətin gərginləşməsi fonunda baş verdiyini qeyd edən Dezir bildirib ki, sülh mesajı gətirib, dünən bu mesajı Yerevana artıq çatdırıb.

“Sülh mesajı deyərkən, biz gərginlik yüksək olduğu üçün yeni müharibənin başlamsı təhlükəsi olduğunu nəzərdə tuturuq. Yeni müharibə mülki əhaliyə əzab-əziyyət gətirəcək”, deyə Dezir bildirib.

Fransa RF və ABŞ-la birlikdə münaqişənin uzunmüddətli həllini tapmağa can atır. “Biz Madrid prinsiplərinin tətbiq edilməsini istəyirik. Əsas güc tətbiqindən imtina, münaqişənin dinc yolla həllidir”, deyən Dezir əlavə edib ki, sülh sazişi hər iki tərəfdən güzəştlər nəzərdə tutur.

2014-cü ilin oktyabrında Fransa prezidenti tərəfindən Azərbaycan və Ermənistan prezidentlərinin sammitinin təşkil edildiyini xatırladan Dezir bildirib ki, bu danışıqlardan sonra BQXK-nin iştirakı ilə itkin düşmüşlərin taleyinə aydınlıq gətirilməsi, qarşılıqlı etimad tədbirlərinin görülməsi məqsədilə görüşlər keçirilib.

Ermənistan prezidenti Serj Sarkisyanın danışıqların davam etdirilməsinin qeyri-mümkün olduğu haqqında bəyanatını şərh etmək xahişinə cavabda Dezir yayınaraq bildirib ki, dialoqa elə indi başlamaq lazımdır.

Ermənistanın BMT TŞ-nin işğal edilmiş ərazilərin azad edilməsi haqqında 4 qətnaməsini yerinə yetirmədiyini xatırlatdıqda Dezir deyib ki, Fransa ABŞ və Rusiya ilə birlikdə münaqişənin “beynəlxalq hüquq normalarına uyğun, Madrid prinsipləri və ərazi bütövlüyünə hörmət əsasında həllinin tərəfdarıdır”. -06C-