ADP rəsmi Bakını repressiyaları dayandırmağa çağırıb

Demokrat Partiyası İdarə Heyətinin toplantısında ölkədəki ictimai-siyasi duruma münasibət ifadə edilib.

Ölkədə insan hüquq və azadlıqlarının pozulması, sərbəst toplaşma, söz və mətbuat azadlığına məhdudiyyətlər, vətəndaş cəmiyyəti institutlarına basqılar, həbslərin davam etdirilməsi pislənilib. Ölkədə insan haqlarının durumu ilə bağlı Avropa Parlamentinin Azərbaycanla bağlı qətnaməsinin və bu yöndə ABŞ prezidenti B.Obamanın çıxışının reallığı əks etdirdiyi ifadə olunub. Toplantıda beyənlxalq aləmin tənqidlərinə baxmayaraq, həbslərin hələ də davam etdiyi nəzərə çatdırılıb. Partiya rəsmi Bakıya repressiyalara son qoymaq, insan hüquq və azadlıqlarının qorurnmasını təmin etmək, beynəlxalq qurumlar önündə götürdüyü öhdəlikləri yerinə yetirmək çağırışı edib.

ADP uzun zaman Azərbaycanı və Azərbaycan xalqını təhqirlərə məruz qoyan Rusiya LDP sədri Vladimir Jirinovskinin Bakı səfərinə təəssüf ifadə edir, ən yüksək səviyyədə qəbul olunmasından narahatlıq keçirdiyini nəzərə çatdırır.

Partiya anti-Azərbaycan mövqe sərgiləyən, türk-müsəlman aləminə nifrətini gizlətməyən bu adamın nəinki ölkəyə səfərinin qarşısının alınmalı olduğunu qeyd edir. Bundan əlavə, V.Jirinovskini ölkə üçün arzuolunmaz şəxs elan olunması və türk-müsəlman dünyasına qarşı müharibə çağırışlarına görə beynəlxalq məhkəmə önünə çıxarılmasının vacibliyini bildirir.  

ADP Müsavat Partiyası üzvlərini yeni başqan seçilməsi münasibətilə təbrik edib. Müsavat Partiyasının fəaliyyətinin millət üçün faydalı olacağına, böyük tarixi olan bir partiyanın zamanın sınağından şərəflə çıxacağına inam ifadə edib. -05D-