Ağ Ev və Dövlət Departamenti Ramil Səfərovun azad edilməsini pisləyir

Ağ Evin mətbuat katibi Tommi Viyetor Azərbaycan hakimiyyətinin Ramil Səfərovu əfv etməsi ilə bağlı bəyanatla çıxış edib:

“Prezident Obama Ramil Səfərov Macarıstandan qaytarıldıqdan sonra Azərbaycan prezidentinin onun əfvi haqqında qərarından dərin narahatlıq hissi keçirir.

Səfərov 2004-cü ildə Budapeştdə erməni zabiti Qurgen Maqaryanı qətlə yetirdiyini etiraf edib və ağır qətl hadisəsinə görə Macarıstanda ömürlük həbs cəzası çəkirdi. Biz Səfərovun əfvi qərarından məyusluğumuzu Azərbaycan hakimiyyətinə çatdırdıq.

Bu addım regional gərginliyi azaltmaq və barışığa şərait yaratmaq səylərinə ziddir. ABŞ həmçinin Macarıstandan Səfərovun Azərbaycana verilməsi haqqında qərarla bağlı izahat gözləyir”, deyə Ağ Evin bəyanatında bildirilir.

Öz növbəsində, ABŞ Dövlət Departamenti də bəyanat yayıb. Bəyanatda bildirilir: 

“ABŞ Azərbaycan prezidentinin Macarıstanın təhvil verdiyi zabit Ramil Səfərovu əfv etməsi xəbərindən həddindən artıq narahatdır”, deyə Dövlət Departamentinin mətbuat katibi Patrik Ventrell bildirib.

“Biz Azərbaycana bu addımla bağlı dərin narahatlığımızı bildiririk və izahat gözləyirik. Biz həmçinin Macarıstandan Səfərovun Azərbaycana verilməsi haqqında qərarla bağlı izahat gözləyirik.

Regional sabitliyi pozan istənilən əməli pisləyirik”, deyə Dövlət Departamentinin bəyanatında qeyd edilib. -25D-