Aİ və Azərbaycan arasında yeni sazişə dair danışıqlar tez başa çatmayacaq

Bakı/12.12.17/Turan: Azərbaycanla Avropa İttifaqı (Aİ) arasında tərəfdaşlıq haqqında yeni sazişlə bağlı danışıqlar gələn ilin sonlarından tez başa çatmayacaq. Azərbaycanın Ümumdünya Ticarət Təşkilatına (ÜTT) daxil olması bir-iki il ərzində mümkün olmayacaq. Bu barədə xarici işlər nazirinin müavini Mahmud Məmmədquliyev jurnalistlərə bildirib.

Onun sözlərinə görə, Azərbaycan Aİ ilə yeni sazişə dair danışıqları 2018- ci llin sonuna qədər başa çatdırmağı planlaşdırır. Danışıqlarda irəliləyiş var.

Dekabrın 15-də Bakı və Brüssel arasında videokonfrans vasitəsilə danışıqların növbəti raundu keçiriləcək.

M.Mahmudquliyev qeyd edib ki, danışıqlarda sektoral və siyasət blokunda irəliləyiş olsa da, ticarət və investisiya sahəsi üzrə ləngimə müşahidə olunur. Bu, Azərbaycanın ÜTT-yə üzv olmaması ilə bağlı ola bilər.

M.Məmmədquliyev Azərbaycanın ÜTT-yə daxil olması məsələsinin aktual olduğunu qeyd edib. "Amma inanmıram ki, bu, bir-iki il ərzində mümkün olsun", - o vurğulayıb.

Hələ 2014-cü ilin noyabrında Aİ Şurası Azərbaycanla yeni saziş üzrə danışıqlar aparmaq üçün Avropa komissiyası və Avropa İttifaqının xarici məsələlər və təhlükəsizlik siyasəti üzrə ali nümayəndəsinə mandat verib.

Ancaq rəsmi danışıqlar 2017-ci il fevralın 7-də başlayıb.-06D-