Amerikanın Vista şirkəti və Azərbaycanın Neft Fondu əməkdaşlığı genişləndirir

Sentyabrın 13-də İlham Əliyev Amerikanın “Vista Equity Partners” investisiya şirkətinin baş direktoru Robert Smiti qəbul edib.

Prezidentin mətbuat xidmətinin yaydığı məlumata görə, görüşdə Azərbaycanın Neft Fondunun Vista şirkəti ilə əməkdaşlığının genişləndirilməsi məsələləri müzakirə olunub.

Robert Smit Dövlət Neft Fondu ilə əməkdaşlığın genişləndirilməsi üçün əlverişli imkanların olduğunu qeyd edib və gələcəkdə mövcud münasibətlərin daha da möhkəmlənəcəyinə inamını ifadə edib. 

Məlumatda Vista və Azərbaycanın Dövlət Neft Fondu arasında əməkdaşlığın nədən ibarət olduğu açıqlanmır.

Vista Equity Partners dünyada ən böyük özəl investisiya şirkətlərindən biridir. O, xüsusən, zərərdə olan şirkətləri əldə edir, maliyyələşdirir və gəlirli şirkətlərə çevirir, daha sonra isə satır.

Şirkətin idarəçiliyində olan aktivlərin ümumi dəyəri 100 milyard dollar təşkil edir. Fəaliyyət göstərdiyi dövr ərzində şirkət 275 milyard dollar dəyərində yüzlərlə investisiya layihəsi həyata keçirib.

Ola bilər ki, Azərbaycanın Dövlət Neft Fondu Vista-nın bəzi sövdələşmələrinə öz sərmayəsini yatırmaqla, bu sövdələşmələrdə şirkətin tərəfdaşı qismində iştirak edəcək.