Anar Məmmədli və Bəşir Süleymanlı azadlıqdan məhrum edilib (YENİLƏNİB)

Bakı Ağır Cinayətlər Məhkəməsi Seçkilərin Monitorinqi və Demokratiyanın Tədrisi Mərkəzinin (SMDT) rəhbəri Anar Məmmədlini 5,5 il müddətinə azadlıqdan məhrum edib.

Həmin QHT-nin icraçı direktoru Bəşir Süleymanlı 3,5 il müddətinə azadlıqdan məhrumetmə cəzası alıb və məhkəmə zalında həbs edilib.

Könüllülərin Beynəlxalq Əməkdaşlığı İctimai Birliyinin (KBƏİB) rəhbəri Elnur Məmmədov 2 il sınaq müddəti olmaqla, 3,5 il müddətinə şərti cəza alıb.

Onlar vergi ödənişindən yayınmaqda, qanunsuz sahibkarlıqda, böyük ölçüdə əmlak mənimsəmə və vəzifə saxtakarlığında təqsirli biliniblər.

Cinayət işi 2013-cü il oktyabrın sonlarında açılıb. A.Məmmədli dekabrın 17-də həbsə alınıb, digər iki şəxsdən isə ölkəni tərk etməmək haqqında iltizam alınıb.

Həbsin əsl səbəbi Azərbaycanda 2013 cü ilin oktyabrında keçirilən prezident seçkilərinin saxtalaşdırılması haqqında rəy olub.

Amnesty İnternational Məmmədlini “vicdan məhbusu” kimi tanıyıb. -16/06D-

2014 May 26 (Bazar ertəsi) 14:43:57

Seçkilərin Monitorinqi və Demokratiyanın Tədrisi Mərkəzinin (SMDT) rəhbəri Anar Məmmədli və digər iki fəal - Bəşir Süleymanlı və Elnur Məmmədov barəsində cinayət işi tamamilə saxtadır və təqsirləndirilən şəxslərin vətəndaş fəallığına görə cəzalandırılması məqsədi güdür. Vəkillərin və təqsirləndirilənlərin özlərinin yekun çıxışlarında səslənən əsas fikir bundan ibarət olub.

Məmmədlinin vəkili Elçin Sadıqov bildirib ki, cinayət işi özü qanunsuz açılıb. Onun sözlərinə görə, Baş Prokurorluğun Ağır Cinayətlər üzrə İstintaq İdarəsi vergi cinayətləri ilə bağlı cinayət işi açmaq hüququna malik deyil.

Prokurorluğun vergi sənədlərinin yoxlanılması məqsədilə SMDT-nin sənədlərini müsadirə etməsi də qanunsuz idi. “Vergi yoxlamalarının belə forması nəzərdə tutulmayıb. Qanunvericiliyə əsasən, vergi yoxlamaları iki formada olur – kameral və səyyar və vergi orqanlarının özləri tərəfindən həyata keçirilir”, deyə Sadıqov bildirib.

Bu zaman, onun sözlərinə görə, vergi əməkdaşları pozuntu aşkar edərsə, əvvəlcə vergi borlarını ödəməyi təklif edirlər, bu baş vermədikdə, yalnız bundan sonra cinayət işi açılır.

Digər tərəfdən, Sadıqov qeyd edib ki, ƏDV-nin ödənilməməsi haqqında iradlar əsassızdır, belə ki, qanunvericiliyə əsasən, qrantlar bu vergidən azaddır.

QHT-lərə Dövlət Dəstəyi Şurasının verdiyi qrantlara ƏDV şamil edilmir. “Ölkənin ən böyük QHT-si – Heydər Əliyev Fondu da ƏDV ödəmir”, deyə Sadıqov qeyd edib.

“Qanunsuz sahibkarlıq” maddəsi üzrə ittiham da əsassızdır, vəkil belə hesab edir.

Qanunsuz sahibkarlıq barədə söhbət belə gedə bilməz, belə ki, təqsirləndirilən şəxslər kommersiya mənfəəti əldə etmək məqsədi daşıyan fəaliyyətlə məşğul olmurdular.

Seçkilərin monitorinqi, seçicilərin maarifləndirilməsi sahibkarlıq fəaliyyəti hesab oluna bilməz.

Sadıqov “mənimsəmə” ittihamının da əsassız olduğunu bildirib.

20 zərərçəkmişdən yalnız biri – Həsən Həsənov təqsirləndirilənlərdən şikayət edib.

Lakin onun istinad etdiyi digər zərərçəkmişlər və şahidlər onun dediklərini təkzib ediblər.

308.2-ci maddə ilə ittihama (vəzifə səlahiyyətlərindən sui-istifadə, ağır nəticələrə səbəb olduqda və ya seçkilərin (referendumun) nəticələrinə təsir etmək məqsədilə törədildikdə) gəlincə, Sadıqovun sözlərinə görə, o, fəalların cinayət təqibinin həqiqi səbəbini üzə çıxarır. Lakin seçkilərin monitorinqi fəaliyyəti səsvermənin nəticələrinə təsir etmək hesab oluna bilməz.

Sadıqov sonda məhkəməni bütün təqsirləndirilənlərə bəraət verməyə və Məmmədlinin Avropa İnsan Hüquqları Konvensiyasının 5-ci (azadlıq hüququ), 10-cu (ifadə azadlığı) və 18-ci (hüquqların məhdudlaşdırılmasında Konvensiyada nəzərdə tutulmuş hüdudların aşılmasının yolverilməz olması) maddələrində zəmanət verilmiş hüquqlarının pozulduğunu etiraf etməyə çağırıb.

Məmmədovun vəkili Cavad Cavadlı həmkarı Sadıqovu dəstəkləyib. Bu zaman o, öz çıxışında diqqəti cinayət işinin açılması üçün əsas olmuş ƏDV ödənişindən yayınma ittihamının əsassız olduğuna çəkib.

O xatırladıb ki, Azərbaycan qanunvericiliyinə və ABŞ-la hökumətlərarası sazişə əsasən, qrantlar ƏDV-dən azaddır.

Cavadlı istintaqın cinayət işində bəhsi keçən qrant müqaviləsinin Ədliyyə Nazirliyində qeydiyyata alınmadığı üçün qrant müqaviləsi hesab edilməməsi haqqında təfsirinin yanlış olduğunu qeyd edib.

Qrantın qeydiyyatdan keçməməsi təqsirləndirilənlərin təqsiri ilə bağlı deyil, belə ki, müqavilə Ədliyyə Nazirliyinə təqdim edilib, lakin bu idarədən qeydiyyatdan imtina haqqında cavab alınmayıb.

Cavadlı da məhkəməni təqsirləndirilən şəxslərə bəraət verməyə çağırıb.

Məmmədlinin digər vəkili İradə Cavadova həmkarlarının arqumentləri ilə razılaşdığını bildirərək, məhkəmədə 20 zərərçəkmişin və 21 şahidin dindirildiyinə və yalnız bir zərərçəkmişin təqsirləndirilən şəxslərə qarşı ifadə verdiyinə diqqət çəkib.

O da vurğulayıb ki, qrant müqaviləsi qeydiyyatdan keçmədiyi üçün qrant müqaviləsi olmaqdan çıxmır, belə ki, söhbət qeyri-kommersiya fəaliyyəti üçün maliyyə yardımı verilməsindən gedir.

Bu zaman Cavadova istintaqın ekspert qismində cəlb etdiyi Vergilər Nazirliyinin əməkdaşının kommersiya və qeyri-kommersiya təşkilatlarını fərqləndirə bilmədiyinə diqqət çəkib.

Süleymanlının vəkili Əlibaba Rzayev həmkarları ilə həmrəy olub, o, 308.2-ci maddə ilə ittihamın müttəhimlərin cinayət təqibinin əsl məqsədlərini ələ verdiyi barədə fikir bildirib.

Onun fikrincə, bütün digər ittihamlar, xüsusən mənimsəmə ittihamı guya ABŞ Milli Demokratiya İnstitutu tərəfindən verilmiş qrantın “mənimsənildiyini” göstərmək məqsədi daşıyır. “Vəsait mənimsənibsə, deməli seçkilərin heç bir monitorinqi aparılmayıb, onun nəticələri haqqında tənqidi hesabat isə “saxtalaşdırılıb”. İttihamın mahiyyəti bundan ibarət idi, baxmayaraq ki, ittiham aaakkktında bu barədə heç nə deyilmir. Lakin məhkəmə istintaqı zamanı real monitorinq aparıldığı təsdiqini tapıb”, deyə Rzayev qeyd edib.

O, həmçinin MDİ-nin təqdim etdiyi seçkilərin monitorinqi layihəsinin həyata keçirildiyini və icraçılara qarşı hər-hansı iradın olmadığını əks etdirən sənədi xatırladıb.

Daha sonra bütün təqsirləndirilənlərin adından yekun sözlə təqsirləndirilən şəxslər özləri çıxış ediblər.

Anar Məmmədli toplaşanları Respublika Günü münasibətilə təbrik edərək, qeyd edib ki, Azərbaycanın müstəqilliyi bərpa edildikdən sonra 96 il əvvəl Azərbaycan Xalq Cümhuriyyətinin elan etdiyi dəyərlərə nail olmaq üçün çox şey etmək olardı. Lakin insanların ifadə, birləşmək azadlığına görə təqib edilməsi göstərir ki, 22 il müstəqillik qaçırılmış fürsətlər dövrü olub.

Daha sonra o, mayın 14-də Azərbaycanın AŞ Nazirlər Komitəsində sədrliyə başladığına diqqət çəkib.

Elə bu günlərdə “Atletico” futbol klubu Çempionlar Liqası Kubokunun finalına üzərində “Azərbaycan – odlar diyarı” yazısı olan köynəklərlə çıxıb və bu, dünyanın diqqətini Azərbaycanın üzərinə çəkib.

“Amma qorxuram ki, ölkəmizin Avropa Şurasında sədrliyinin sonuna doğru Azərbaycan “siyasi məhbuslar diyarı” kimi məşhurlaşacaq”, deyə Məmmədli bildirib.

Daha sonra o deyib ki, cinayət işi vətəndaş fəallığına və seçkilərin monitorinqinin keçirilməsinə görə cəzalandırmaq məqsədilə açılıb.

“2001-ci ildən etibarən monitorinqlər həyata keçirən təşkilat, istintaqın təqdim etməyə çalışdığı kimi, cinayət qrupu ola bilməz”, deyə Məmmədli bildirib.

Bu zaman o qeyd edib ki, 2008-ci ildə Seçkilərin Monitorinqi Mərkəzinin qeydiyyatı ləğv edilib, yeni SMDT-ni isə Ədliyyə Nazirliyi qeydiyyata almaqdan imtina edib.

Buna görə Məmmədli fiziki şəxs kimi qrant almaq məcburiyyətində qalıb.

Bu zaman 2008-2013-cü illər ərzində təşkilatın fəaliyyəti şəffaf olub, 480 min manat məbləğində qrantlar alınıb. Bu vəsait ƏDV-dən və bir sıra digər ödənişlərdən azad olub. Bununla belə, Məmmədli özü öz maaşından 12 min manat vergi ödəyib.

Lakin 2013-cü ilin əvvəllərində qanunvericiliyə dəyişikliklər edildikdən sonra SMDT prezident seçkilərinin monitorinqi layihəsini həyata keçirmək üçün tərəfdaş kimi qeydiyyatı olan Könüllülərin Beynəlxalq Əməkdaşlığı İctimai Birliyini (KBƏİB) cəlb etmək məcburiyyətində qalıb.

Məmmədli prezident seçkilərinin nəticələrinə təsir etmək ittihamını absurd adlandırıb. Çünki bu maddə seçki komissiyalarının, dövlət və bələdiyyə məmurlarının üzvlərinə aid ola bilər.

Süleymanlı və Məmmədov da ittihamları təkzib ediblər və məhkəməni bəraət hökmü çıxarmağa çağırıblar. --

2014 May 26 (Bazar ertəsi) 13:07:49

Bu gün Bakı Ağır Cinayətlər Məhkəməsində hakim Rauf Əliyevin sədrliyi ilə  Seçkilərin Monitorinqi və Demokratiyanın Tədrisi Mərkəzinin (SMDT) rəhbəri Anar Məmmədlinin və digər iki fəalın – Bəşir Süleymanlı və Elnur Məmmədovun işi üzrə müdafiə tərəfinin çıxışı olub.

Turan-ın müxbirinin məhkəmədən verdiyi məlumata görə, vəkillər İradə Cavadova, Cavad Cavadlı və  Elçin Sadiqov müdafiə etdiklərin şəxslərin  günahkar olmadıqlarını, onların hər birinin siyasi sifariş əsasında həbs olunduqlarını bildiriblər.

Son sözlə çıxış edən Anar Məmmədli  bir daha  qeyd edib ki, onun həbsi  siyasi motivlidir və prezident seçkiləri amanı müstəqil monitorinq aparması ilə əlaqədardır.

Bəşir Süleymanlı və Elnur Məmmədov da  özlərini təqsirli bilmədiklərini söyləyiblər.

Son sözdən sonra məhkəmədə  fasilə elan olunub.

Hökm   bu gün saat 16:00-da oxunacaq.

Dövlət itthamçısı hər üç müttəhimi bütün ittiham bəndləri üzrə təqsirli bilərək A. Məmmədlini 3 il ərzində dövlət, özəl və ictimai qurumlarda vəzifə tutmaq hüququndan məhrum edilməklə 9 il, B.Süleymanlını 2 il ərzində vəzifə tutmaq hüququndan məhrum edilməklə 8,5 il, E.Məmmədovu 2 il vəzifə tutmaq hüququndan məhrum edilməklə 8,5 il müddətinə azadlıqdan məhrum etməyi istəyib.

* SMDT rəhbəri Anar Məmmədli, bu QHT-nin icraçı direktoru Bəşir Süleymanlı və Könüllülərin Beynəlxalq Əməkdaşlığı İctimai Birliyinin (KBƏİB) rəhbəri Elnur Məmmədov CM-in 5 maddəsi üzrə - vergi ödənişindən yayınmaq, qanunsuz sahibkarlıqla məşğul olmaq, vəzifə səlahiyyətlərindən sui-istifadə, böyük ölçüdə əmlak mənimsəmə və vəzifə saxtakarlığında ittiham olunurlar. Cinayət işi 2013-cü il oktyabrın sonlarında açılıb. A.Məmmədli dekabrın 17-də həbsə alınıb, digər iki şəxsdən isə ölkəni tərk etməmək haqqında iltizam alınıb.

Həbsin əsl səbəbi Azərbaycanda 2013-cü ilin oktyabrında keçirilən prezident seçkilərinin saxtalaşdırılması haqqında rəy olub.

Amnesty İnternational Məmmədlini “vicdan məhbusu” kimi tanıyıb. -16/06D-