Əfv fərmanı hüquq müdafiəçilərini məyus etdi

Prezidentin əfv fərmanı siyasi məhbuslar problemini həll etməməklə hüquq müdafiəçilərini məyus etdi.

“Bu əfv fərmanı bizi məyus etdi. Bir neçə hüquq müdafiəçisi 30 nəfərdən ibarət siyahı təqdim etdik əfv üçün. Amma o sıradan cəmi 5 nəfər azad edilib. Əsas da bunu gətirirlər ki, bu şəxslərin apellyasiya məhkəmələri keçirilməyib. O zaman biz alternativ yol təklif edirik. AŞPA-nın iyun sessiyasına kimi bu siyahıda adları olan Tofiq Yaqublunun, İlqar Məmmədovun, Yadigar Sadıxlının, “NİDA”ların, keüçmiş səhiyyə naziri Əli İnsanovun, Əvəz Zeynallının, Hilal Məmmədovun vəs. Apellyasiya məhkəmələri keçirilsin.

Əgər rəsmi Bakı AŞPA-nın iyun sessiyasına kimi 30 nəfər siyasi məhbusu həbsdən azad etməsə sessiya zamanı 30 nəfər yox, 130 nəfər məhbusa görə Azərbaycan Avropa Şurasının tənqid hədəfi olacaq”, deyə hüquq müdafiəçisi Novella Cəfəroğlu bildirib.

İnsan hüquqları və qanunçuluğa riayət edilməsi üzrə Büronun rəhbəri Səidə Qocamanlı qeyd edib ki, hüquq-müdafiə təşkilatlarının Monitorinq Qrupunun siyahısından jurnalistlər Fərəməz Allahverdiyev və Fuad Ağayev, habelə gənc gəal Daşqın Məlikov əfv olunub.

Onun fikrincə bəzi siyasi məhbuslar, xüsusən İlqar Məmmədov, Tofiq Yaqublu, Yadigar Sadıqov və 8 NİDA fəalı apellyasiya məhkəmələri zamanı azad edilə bilər.

Əfvlərlə siyasi məhbuslar problemini həll etmək olmaz. Problem o vaxt həll ediləcək ki, insanların siyasi motivlərlə təqibinə son qoyulsun, deyə Hüquq-müdafiə və maarifləndirmə cəmiyyətinin rəhbəri Rəsul Cəfərov bildirib.

Sülh və Demokratiya İnstitutunun direktoru Leyla Yunus da bu fikirdədir.

O, AŞ və Azərbaycan arasında 2014-16-cı illər üçün Fəaliyyət Planını skeptik qiymətləndirib.

Bu sənəddə gözəl sözlər çoxdur, amma ölkədə müstəqil məhkəmə sistemi yoxdur.

Vəziyyətdən çıxış yolu Azərbaycan vətəndaşlarının özlərinin qanunçuluq və demokratiya tələb etməsindədir. “Biz öz hüquqlarımızı tələb etməsək, heç bir beynəlxalq təşkilat bizə kömək etməyəcək, həmişəki kimi qul kimi yaşamağa davam edəcəyik”, deyə Yunus qeyd edib. -06C-