Angela Merkel İlham Əliyevlə görüşündə Azərbaycanda insan hüquqları məsələsinə toxunub

Bakı/25.08.18/Turan: Almaniya Dağlıq Qarabağ münaqişəsinin nizamlanmasında vasitəçi rolunu oynamağa hazırdır. Bu barədə AFR kansleri Angela Merkel avqustun 25-də Bakıda Azərbaycan prezidenti İlham Əliyevlə danışıqları ərəfəsində bildirib. "Almaniya məsələnin dinc yolla həllinin tapılmasına yardım etmək istərdi", - Reuters agentliyi A.Merkeldən sitat gətirib.

AFR hökumətinin başçısı xatırladıb ki, Berlin Qarabağ münaqişəsinin dinc yolla nizamlanmasına rəhbərlik edən ATƏT-in Minsk Qrupunun üzvüdür.

İ.Əliyevlə A.Merkelin görüşü iki ölkə nümayəndə heyətlərinin iştirakı ilə geniş formatda keçirilib.

İ.Əliyev səfəri "tarixi" adlandırıb və bunun münasibətlərə yeni təkan verəcəyinə əmin olduğunu bildirib.

A.Merkel iqtisadi əlaqələrin genişləndirilməsi üçün imkanların olduğunu qeyd edib. "Azərbaycan bu regionda Almaniyanın ən iri ticarət tərəfdaşıdır", - o vurğulayıb. Bununla yanaşı o, hüquq-müdafiə mövzusuna da toxunub. "Biz yəqin ki, bəzi kritik məqamlara da toxunacağıq və bunlar insan hüquqları və humanitar vəziyyətdir", - A.Merkel bildirib. (AzərTAC).

Dialoqun yekunlarına əsasən siyasətçilər birgə mətbuat konfransı keçiriblər.

AFR kansleri və Azərbaycan prezidenti Avropa İttifaqındakı istehlakçıların qaz təchizatında Azərbaycanın rolunu qeyd ediblər.

Berlin və Brüssel Rusiyanın "mavi yanacaq"ından asılılığı azaltmaq üçün öz enerji resursları bazarlarını diversifikasiya etmək istəyirlər. "Bununla əlaqədar Cənub (qaz- - DW.) dəhlizinin (CQD) açılması Aİ-nin enerji təchizatı üçün yaxşı xəbərdir", - o deyib və əlavə edib ki, Berlin enerji xammalının təchizatı sahəsində Bakı ilə əməkdaşlığı möhkəmləndirə bilər.

Öz növbəsində İ.Əliyev qeyd edib ki, Azərbaycan Avropaya satılan qazın həcmini artırmağa hazırdır. Ancaq Türkmənistan qazının Azərbaycan ərazisilə Avropaya nəqlinin mümkünlüyü barədə sualı cavablandırmayıb.

Xəzərin hüquqi statusu razılaşdırıldıqdan sonra belə ssenari daha real olacaq, lakin dənizin dibinin və təkinin bölünməsi məsələsi hələlik açıq qalır. (DW).

A.Merkel işgüzar dairələrin nümayəndələri ilə görüş zamanı məmnunluqla qeyd edib ki, Azərbaycanda Almaniya Xarici Ticarət Palatası var. Burada Almaniyanın 150 şirkəti fəaliyyət göstərir.

"Prezident də qeyd etdi ki, ölkə iqtisadiyyatının inkişafına töhfə vermək üçün digər müəssisələr də ürəkdən dəvət olunur. Bizim bunda böyük marağımız var.

Azərbaycan dünyəvi dövlətdir. Biz bu barədə danışdıq. Bu gün Azərbaycan dünyəvi müsəlman dövlətidir. Baxmayaraq ki, biz bu gün dünyanın bir çox ölkələrində islamlaşmanın daha da güclənməsi trendlərini müşahidə edirik. Bu uğurlar Azərbaycan iqtisadiyyatı üçün böyük önəm kəsb edir. Almaniya bundan ötrü yaxşı partnyor ola bilər", - AzərTAC A.Merkeldən sitat gətirir.

" Almaniyadan olan şirkətlər Azərbaycanda uzun illərdir fəaliyyət göstərir, onlar bir çox sahələrdə işləyiblər, müxtəlif layihələr icra ediblər. Yalnız dövlət vəsaiti hesabına Almaniya şirkətləri dəyəri 1 milyard dollardan çox layihələr icra ediblər və əminəm ki, gələcəkdə bu rəqəm daha da artacaq", - İ.Əliyev vurgulayıb.

Prezidentin sözlərinə görə, Almaniya şirkətləri Azərbaycanda yaxşı tanınır. "Onların keyfiyyəti və texnologiyası bizim ölkəyə böyük fayda gətirir", - dövlət başçısı deyib.

Prezident Almaniya şirkətlərinin Azərbaycan iqtisadiyyatının qeyri-neft sektorunun inkişafına dəstək göstərəcəyinə ümidvar olduğunu bildirib.

Qeyd edək ki, mətbuat konfransında xarici jurnalistlərdən biri İ.Əliyevdən liderlərin həbsdə olan jurnalistlər -Əfqan Muxtarlı və digərləri ilə bağlı məsələnin müzakirə olunub-olunmadığını soruşub.

İ.Əliyev sualın cavabında deyib ki, Azərbaycanda bütün azadlıqlar təmin olunub, o cümlədən mətbuat azadlığı. Tənqidə, fərqli baxışa görə heç kim təqib olunmur.

Eyni zamanda o qeyd edib ki, iki liderin görüşündə bütün məsələlər eyni dərəcədə əhəmiyyətli olub, o cümlədən insan haqları və demokratiya da. (https://www.azadliq.org). -06d--