A.Paşazadə islam ölkələrinə Qarabağı unutmamaq təklifi verdi

Qafqaz Müsəlmanları İdarəsi (QMİ) cümə günü “Təzə Pir”də “Qüdsü və Qarabağı unutma” mövzusunda konfrans keçirib.

Tədbiri açan QMİ sədri Allahşükür Paşazadə Allahın bərəkət ayı olan Ramazan ayının artıq yekunlaşmaqda olduğunu söyləyib. Bu ayda Quran-i-Kərimin yer üzünə endirilməsi Həqqin bəşəriyyətə ən böyük inayəti adlandırılıb.

Ramazan ayının son cümə gününü islam dünyasının həmd də “Qüdsü anım günü” kimi qeyd etdiyi xatırladılıb. Bu səbəblə A.Paşazadə islam dünyasındakı duruma toxunub. Qüdsün azad olunmasının vacibliyi önə çəklib. Dünya sionizminin buna müqavimət göstərməsi pislənilib. Amma istəniləın halda, bütün proseslərin dinc yolla həllini tapmalı olduğu xüsusi vurğulanıb. 

Bu kontekstdə A.Paşazadə islam dünyası ölkələrinə Qarabağ məsələsini də diqqət mərkəzində saxlamaq təklifi səsləndirib. 

Aralıq dənizinin şimali Afrika sahilləri boyunca müsəlman ölkələrindəki vəziyyət də diqqət mərkəzində olub. Bu ölkələrdə qarşıdurmaların artdığı, Suriyada isə vətəndaş müharibəsinin bütün miqyası ilə baş alıb getdiyinə təəssüf olunub. QMİ sədri bu ölkələrin xalqlarına səbr diləyərək, bütün məsələlərin dinc danışıqlar yolu ilə çözülməsinin vacibliyini önə çəkib.

Bununla yanaşı, QMİ sədri Ramazan ayının qarşıdakı “eyd-Fitr” günü (Fitrə bayramı) ilə bağlı bütün dünya müsəlmanlarını təbrik edib, rifah, sülh, rahat həyat, sağlamlıq və firavanlıq arzu edib.

Tədbirdə din xadimləri, ictimaiyyət təmsilçiləri, Fələstin, Pakistan, İran dövlətlərinin səfirləri, A.Paşazadə ilə yanaşı İordaniyanın, Fələstinin səfirləri və s. şəxslər çıxış ediblər. Fələstin səfiri tədbirdə Qüdsün işğalı ilə bağlı ətraflı məlumat verib. -05C-