AŞPA Komitəsinin qətnamə layihəsində Azərbaycanın işğal edilmiş ərazilərini azad etmək çağırışı yer alır

Avropa Şurası Parlament Assambleyasının (AŞPA) Siyasi məsələlər komitəsi dünən ATƏT-in Minsk prosesi çərçivəsində “Ermənistan silahlı qüvvələrinin və digər qeyri-müntəzəm birləşmələrin Dağlıq Qarabağdan və Azərbaycanın işğal edilmiş digər ərazilərindən çıxarılmasına və Azərbaycanın bu ərazilər üzərində tam suverenliyinin bərpa edilməsinə” çağırış yer alan qətnamə layihəsini təqdir edib. Bu barədə Komitənin yaydığı press-relizdə deyilir.

Komitə həmçinin “təhlükəsizliyə və daxili özünüidarəetməyə zəmanət verən, Emənistanı Dağlıq Qarabala birləşdirən razılaşdırılmış dəhliz olmaqla, habelə etimadın möhkəmləndirilməsi üzrə digər tədbirlərin görülməsilə, o cümlədən Naxçıvana dəhliz və çıxış təmin edilməklə, Dağlıq Qarabağın müvəqqəti statusunun işlənib hazırlanması üçün” Minsk qrupunun plenar iclasını çağırmağa” dəvət edir.

Təmas xəttinə yaxın mülki yaşayış məntəqələrinə qarşı qərəzli əməlləri qətiyyətlə pisləyən Komitə Dağlıq Qarabağ probleminin digər böyük beynəlxalq böhranlarla eyni cərgədə durmasından təəssüf edir.

“Münaqişənin tənzimlənməsinin bundan sonra da təxirə salınması yalnız 2014-cü ildən etibarən yüzdən çox insanın həyatına son qoymuş və Avropa Şurasının üzvü olan iki dövlət arasında əsl müharibəyə çevrilə biləcək bu “dondurulmamış” münaqişənin həllini yalnız çətinləşdirir”, deyə məlumatda bildirilir.

Ermənistanın da, Azərbaycanın da 2001-ci ildə Avropa Şurasına daxil olarkən münaqişənin həlli üçün yalnız dinc vasitələrdən istifadə etmək öhdəliyi götürdüyünü xatırladaq Komitə hər iki ölkənin hökumətini hərbi qüvvədən istifadə etməməyə çağırıb.

Komitə həmçinin ATƏT-i Dağlıq Qarabağda və digər işğal edilmiş ərazilərdə təhlükəsizliyin qorunub saxlanması üçün beynəlxalq sülhməramlı qüvvələr yaratmağa, məcburi köçkünlərin təhlükəsiz şəkildə qayıtmasını, habelə atəşkəs rejiminin pozulması hallarının araşdırılması mexanizminin yaradılmasını təmin etməyə çağırıb.

Robert Uolterin (Böyük Britaniya, Aİ) məruzəsinə əsaslanan qətnamə layihəsi Assambleyanın 2016-cı il yanvar sessiyasında müzakirə edilməlidir. -06D-