ATƏT-in Minsk Qrupunun həmsədrləri Bakıda danışıqlara başlayıblar

ATƏT-in Minsk Qrupunun həmsədrləri Ceyms Uorlik (ABŞ), Jak For (Fransa) və İqor Popov (Rusiya) noyabrın 3-də Azərbaycana qısamüddətli səfərə gəliblər.

Amerikanın Azərbaycandakı səfirliyinin mətbuat xidmətindən Turan-a bildirilib ki, həmsədrlər noyabrın 4-də gün ərzində Azərbaycanın dövlət rəsmiləri ilə görüşlər keçirəcəklər. 

Həmsədrlərin Azərbaycan və Ermənistan prezidentlərinin növbəti görüşünün keçirilməsini müzakirə etdikləri güman olunur. 

Ötən həftə Amerikanın Azərbaycandakı səfiri Riçard Morninqstar Turan-a müsahibəsində deyib ki, Amerika münaqişənin həll olunmasına sadiqdir.

“Dövlət katibi Kerri bu məsələ ilə çox yaxından maraqlanır, bu işin həll olunmasını çox istəyir və maraqlıdır. Bizim yeni həmsədrimiz var. Səfir Uorlik bu məsələyə yeni yanaşma gətirir, yeni yanaşma sərgiləyir. Mən bunu ona görə deyirəm ki, cənab Uorlikin Bakıda prezident və xarici işlər naziri ilə iki görüşündə iştirak etmişəm. Düşünürəm ki, o da, biz də Ermənistanda və Azərbaycanda seçkilərin başa çatmasından sonra bir fürsətin yaranmasını görürük. Ümidvarıq ki, bu il ərzində hər iki ölkə prezidentləri arasında görüş baş tutacaq. Biz əlimizdən gələni edəcəyik. Minsk Qrupu vasitəsi ilə səylərimizi davam etdirəcəyik və səfir Uorlikin səyləri, yeni yaradıcı yanaşmaları vasitəsi ilə ümidvarıq ki, hazırkı ölü nöqtədən, dalandan məsələnin irəli getməsinə, irəliləyişin əldə edilməsinə nail olacağıq”, - bildirib. -03B-