ATƏT missiyasına hücumda kimlər iştirak edib?

Oktyabrın 10-da Bakıda mətbuat konfransı zamanı ATƏT missiyasına misli görünməmiş hücum və təzyiq qalmaqalı maraqlı şəkildə davam edib. Hakimiyyətin baş ideoloqu Əli Həsənov ATƏT nümayəndələrini psixoloji təzyiq göstərən şəxsləri, faktiki olaraq, dəstəkləyib.

Xüsusən, Həsənov bildirib ki, ATƏT DTİHB missiyasının qiymətləndirmələri qeyri-obyektiv olub və Bakı bu təşkilatla münasibətlərinə yenidən baxacaq. O, hökumətyönlü jurnalistlər qrupunun davranışı, daha dəqiq isə, xuliqanlığı haqqında bir söz belə deməyib.

Bu, “xalq narazılığının ifadə olunması” aksiyasının hakimiyyət tərəfindən əvvəlcədən planlaşdırıldığının və ona hazırlıq olduğunun dolayı təsdiqidir.

İlk növbədə, Hyatt Regency otelindəki mətbuat konfransına az qala bütün Mətbuat Şurası gəlib və məhz MŞ üzvləri mətbuat konfransının pozulmasında fəal şəkildə iştirak edib.

Ən çox qışqıran və missiya üzvlərinə hücum edənlər rəsmi “Xalq” qəzetinin, hakim partiyanın mətbu orqanı olan “Yeni Azərbaycan” qəzetinin, “Səs”, İki Sahil” qəzetlərinin, habelə vatan.info və olaylar saytlarının nümayəndələri olub. Bir sıra telekanalların reportyorları da onlara qoşulub.

Hakimiyyətin bu qalmaqalda əli olmasının daha bir təsdiqi Əli Həsənovun müavini Vüqar Əliyevin yerində olmasıdır.

Bundan başqa, zalda gənclər təşkilatlarının fəalları əyləşdirilib, onlar “mənəvi” dəstək göndərir və göstəriş verildiyi zaman səs-küyü artırırdılar.

Müxalifət cərgələrindən kimsə belə bir şey etsə, hakimiyyət bunu mədəniyyətsizlik və Azərbaycanın nüfuzuna xələl gətirmək adlandırardı. Onlar uzun müddət müxalifətin mədəniyyətsiz, təhsilsiz insanlar olduğunu, özlərini necə aparacaqlarını bilmədiklərini yazardı.

Bu qalmaqalı Turan-a şərh edən media üzrə hüquqşünas Ələsgər Məmmədli deyib ki, hökumətyönlü jurnalistlərin davranışı jurnalist etikasının kobud şəkildə pozulmasıdır. Bu qalmaqalda iştirak etmiş MŞ üzvləri bu orqandan çıxarılmalıdır.

Baş verənlər Azərbaycanda söz və ifadə azadlığı sahəsində vəziyyətin o dərəcədə ağır olduğunu göstərir ki, hakimiyyət nümayəndələri bu qədər açıq-aşkar, utanmadan və çəkinmədən beynəlxalq nümayəndələrə təzyiq göstərir, deyə Məmmədli qeyd edib.

“Ölkə hakimiyyəti bir daha bütün dünyaya göstərdi ki, başqasının fikrini qəbul etmir. Onlarla kamera önündə, çoxsaylı xarici müşahidəçilərə qarşı belə bir şey baş verirsə, kənar gözlərdən uzaqlarda nələr baş verdiyini təsəvvür etmək olar.

Baş verənlər bir daha təsdiq edir ki, Azərbaycanda başqasının fikrinə dözüm yoxdur”, deyə hüquqşünas vurğulayıb. -02В-