Avqustun 18-nə demokratik seçkilər tələbi ilə mitinq təyin olunub

Demokratik Qüvvələrin Milli Şurası) avqustun 18-nə azad və ədalətli seçkilərin keçirilməsi üçün şəraitin təmin olunması tələbilə mitinq təyin edib. Aksiya həm də DQMŞ-nin prezidentliyə namizədi Rüstəm İbrahimbəyovun namizədliyinin dəstəklənməsi ilə bağlı olacaq.

Bu qərarlar avqustun 12-də axşam DQMŞ-nin sessiyasından sonra qəbul edilib. Sessiya Klassik Azərbaycan Xalq Cəbhəsi Partiyasının mənzil-qərargahında keçirilib. Tədbirdən sonra KAXCP-nın sədri Mirmahmud Mirəlioğlu və DQMŞ İcra Aparatının rəhbəri Eldar Namazov mətbuat qarşısına çıxıblar.

M.Mirəlioğlu bildirib ki, DQMŞ-nin hakimiyyətin dinc yolla dəyişdirilməsinə nail olmaqda və demokratik seçkilərin keçirilməsi üçün şəraitin yaradılmasını tələb etməkdə əzmli olduğunu göstərmək məqsədilə avqustun 18-də saat 17.00-dan 20.00-dək demokratik qüvvələrin mitinqi keçiriləcək.

Bakı Şəhər İcra Hakimiyyətinə göndərilən xəbərdarlıq məktubunda mitinqdə 20 min nəfərin iştirak edəcəyi bildiriləcək.

Meriyaya 4 yerdən birində mitinq keçirilməsinə icazə verilməsi təklif olunur – “Dərnəgül” metro stansiyasının qarşısındakı meydan, “Təbriz” kinoteatrının qarşısındakı meydan, “Nərimanov” metro stansiyasının qarşısındakı meydan və 20-ci sahədə sürücülük məktəbinin meydanı.

Mitinqdə prezidentliyə namizədlər üçün bərabər imkanların yaradılması, DQMŞ-dən vahid namizəd Rüstəm İbrahimbəyovun qeydiyyatı üçün maneələrin aradan qaldırılması, seçkiqabağı kampaniya dövründə toplaşma və ifadə azadlığının, KİV-də siyasi plüralizmin təminatı tələb olunacaq. Bundan əlavə, siyasi məhbusların azadlığa buraxılması, vətəndaşların mülkiyyət hüquqlarının təminatı, vətəndaşların iradəsinə zidd olaraq daşınmaz əmlakın sökülməsinə son qoyulması tələb olunacaq.

M.Mirəlioğlu bildirib ki, DQMŞ müxalifətin vahid namizədi R.İbrahimbəyovun seçkilərdə iştirakı üçün sonadək mübarizə aparacaq.

“R.İbrahimbəyovun Rusiya vətəndaşlığından çıxmaq  məsələsi həll olunmasa və seçkilərdə iştirakı mümkün olmasa DQMŞ-dən digər namizədlərin irəli sürülməsi ilə bağlı onun öz müraciəti müzakirə olunub?” sualına M.Mirəlioğlu müsbət cavab verib.

Lakin onun sözlərinə görə, DQMŞ üzvləri bu məsələyə avqustun 19-da növbəti sessiyada qayıtmaq niyyətindədir. M.Mirəlioğlunun fikrincə, R.İbrahimbəyovun namizədliyinin qeydiyyatı üçün bütün imkanlar tükənməyib. Ən azı 18 avqust mitinqinə qədər DQMŞ-nin vahid namizədi R.İbrahimbəyov olacaq və aksiyada onun namizədliyi dəstəklənəcək.–03C06--