Avropa Şurası Gürcüstanın milli azlıqların hüquqlarının müdafiəsi üzrə vəzifələrini müəyyənləşdirib

Gürcüstan cəmiyyəti müxtəlifliyə hörmətlə yanaşır, lakin milli və dini azlıqları özünün ayrılmaz və dəyərli hissəsi kimi tanımaq üçün daha çox fəaliiyətə ehtiyac var.

Gürcüstanda azlıqların hüquqlarının müdafiəsinə ümumi dəstək atmosferi üstünlük təşkil edir, lakin cəmiyyətdəki bütün insanlar arasında qarşılıqlı hörmət və dialoq mühiti yaratmaq üçün hakimiyyət tərəfindən əlavə tədbirlər görülməlidir. Milli azlıqlara mənsub olanlara Gürcüstan cəmiyyətinin bərabər, ayrılmaz və dəyərli hissəsi kimi baxmaq və qəbul etmək lazımdır, Gürcüstan haqqında yeni rəyin mühüm nəticələri belədir. Rəy bu gün Avropa Şurasının milli azlıqların müdafiəsi haqqında Çərçivə Konvensiyası üzrə Məşvərət Komitəsi tərəfindən dərc olunub.

Məşvərət Komitəsi Gürcüstan hakimiyyətini inam və qarşılıqlı hörmətin möhkəmləndirilməsi üzrə konkret addımlar atmaq yoluyla bütün milli azlıqların sosial inteqrasiyasını təşviq etmək üçün daha aktiv hərəkətlərə çağırır.

Söhbət əhalinin milli azlıqların hüquqları və ölkənin qanunları barədə məlumatlılığının artırılması tədbirlərindən gedir.

Bəzi milli azlıqlara mənsub olanlar üçün əksər hallarda da ciddi dil tələbləri və digər praktik maneələr səbəbindən Gürcüstan vətəndaşlığı almaq problemli olaraq qalır. Məşvərət Komitəsi milli azlıqların, o cümlədən etnik azərbaycanlıların üzləşdikləri bərabərsizlik problemini həll etmək üçün hakimiyyəti azlıqların nümayəndələrilə əməkdaşlığı təmin etməyə çağırır.

Azlıqlara mənsub şəxslərin Gürcüstanın siyasi, sosial və iqtisadi həyatında qeyri-kafi və qeyri-qənaətbəxş iştirakı da narahatlıq doğurur.

Hesabatda deportasiya edilmiş ahıska türklərinin repatriasiya məsələsinə də toxunulur. Az sayda ahıska türkü Gürcüstana qayıdıb. Bildirilib ki, dövlət repatriasiya olunmuş ahıska türklərinin “Gürcüstan vətəndaşlığı almasına keçilməz maneələr" yaradıb, o cümlədən digər dövlətlərin (əsasən Azərbaycanın, qeyd hesabat müəlliflərinindir) vətəndaşlığından imtina etmək öhdəliyi qoyub.  Çoxları ehtiyat edir ki, yeganə vətəndaşlığından imtina edərsə, vətəndaşlığı olmayan şəxs riskilə üzləşər. Məşvərət Komitəsi hakimiyyəti ibtidai və orta məktəb səviyyəsində ümumi dərs proqramında azsaylı azlıqların dillərində tədrisi genişləndirməyə çağırır.

Milli azlıqların, əsasən azərbaycanlıların və ermənilərin mədəniyyəti və ədəbiyyatı üzrə dərs proqramları hazırlanmalı, universitet səviyyəsində müəllim hazırlığı təmin edilməlidir.