AXCI fəalı 6,5 il müddətinə azadlıqdan məhrum edilib

Dekabrın 10-da Gəncə Ağır Cinayətlər Məhkəməsi hakim Natiq Əliyevin sədrliyi ilə Azərbaycan Xalq Cəbhəsi Partiyasının (AXCP) Daşkəsən Rayon Şöbəsinin sədri Sahib Məmmədzadəni külli miqdarda narkotik vasitənin qanunsuz dövriyyəsində təqsirli bilərək, 6 il 6 ay həbsə məhkum edib. Bu barədə Turan-a vəkil Zabil Qəhrəmanov bildirib.

Onun sözlərinə görə, hökmdən apellyasiya şikayəti veriləcək.

Vəkil qeyd edib ki, məhkəmə narkotik vasitənin Məmmədzadəyə məxsus olduğunu sübuta yetirməyib.

"Məmmədzadə bildirdi ki, narkotiki polislər onun cibinə qoyub. Hal şahidləri də narkotikin Məmmədzadəyə air olduğunu təsdiq etmədilər. Məmmədzadə özü AXCP-nin Daşkəsən rayon şöbəsinin sədri olduğu üçün siyasi fəaliyyətinə görə şərləndiyini diqqətə çatdırdı", deyə vəkil qeyd edib.

Məmmədzadə 2024-cü il martın 18-də mal-qarasını yaylağa apararkən polislər tərəfindən saxlanılıb. Ona qarşı Cinayət Məcəlləsinin 234.4.3 maddəsi (Qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma- külli miqdarda) ilə cinayət işi qaldırılıb.

Martın 19-da Göygöl Rayon Məhkəməsi onu həbs edib.

Bir müddət əvvəl Məmmədzadə Daşkəsən rayonunun Xoşbulaq kəndində yerli otlaqların oliqarx məmurlar tərəfindən ələ keçirilməsinə qarşı etiraz aksiyası haqqında videomaterial yaymışdı.