Azərbaycan və Səudiyyə Ərəbistanının xarici işlər nazirlikləri arasında siyasi məsləhətləşmələr

9 dekabr 2024-cü il tarixində Ər-Riyad şəhərində Azərbaycan Respublikası və Səudiyyə Ərəbistanı Krallığı Xarici İşlər Nazirlikləri arasında siyasi məsləhətləşmələrin üçüncü raundu keçirilib, bu barədə Azərbaycan XİN məlumat yayıb.

Azərbaycan Respublikasının nümayəndə heyətinə xarici işlər nazirinin müavini Yalçın Rəfiyev, Səudiyyə Ərəbistanı Krallığının nümayəndə heyətinə xarici işlər nazirinin müavini Valid Əl-Xureyci rəhbərlik edib.

Görüş zamanı iki ölkə arasında əlaqələrin gücləndirilməsi, siyasi, iqtisadi, energetika və humanitar sahələrdə əməkdaşlığın hazırkı vəziyyəti və inkişaf perspektivləri müzakirə olunub.

Görüşdə Azərbaycan və Səudiyyə Ərəbistanı arasında BMT, İslam Əməkdaşlıq Təşkilatı, Qoşulmama Hərəkatı və digər beynəlxalq təşkilatlar çərçivəsində əməkdaşlıq imkanlarına dair fikir mübadiləsi aparılıb, qarşılıqlı dəstəyin bundan sonra da davam etdirilməsi razılaşdırılıb.

 Görüşdə turizm, yaşıl enerji və investisiya qoyuluşu sahələrində əməkdaşlığın inkişafı üçün geniş potensialın olduğu vurğulanıb.

 Siyasi məsləhətləşmələr zamanı həmçinin regional, beynəlxalq məsələlər və birgə maraq kəsb edən digər mövzular da müzakirə olunub.

 Səfər çərçivəsində Y.Rəfiyev həmçinin Səudiyyə Ərəbistanı Krallığının enerji nazirinin davamlılıq və iqlim dəyişikliyi üzrə müavini Xalid Əl-Mehaid ilə də görüşüb.