Azər Qasımlı ruh yüksəkliyini qoruyub saxlayır - Samirə Qasımlı

Siyasi Menecment İnstitutunun direktoru, politoloq Azər Qasımlının 1 saylı Bakı İstintaq Təcridxanasında saxlanma şəraitindən şikayəti yoxdur və o, ruh yüksəkliyini qoruyub saxlayır. Bu barədə Turan-a onun həyat yoldaşı Samirə Qasımlı dekabrın 20-da 1 saylı Bakı İstintaq Təcridxanasında ona baş çəkdikdən sonra bildirib.

Onun sözlərinə görə, Qasımlı onunla maraqlanan hər kəsə salam deyib. Görüş şüşə arakəsmə arxasından keçirilib və onlar normal şəraitdə söhbət edə bilməyiblər, deyə Samirə Qasımlı qeyd edib.

* Qasımlı dekabrın 8-də pul tələb etmə ittihamı ilə (CM-in 182.2.3-cü maddəsi) saxlanılıb. Onu 5 ildən 10 ilədək azadlıqdan məhrumetmə cəzası gözləyir. Dekabrın 9-da məhkəmə onu 4 ay müddətinə həbs edib.

Qasımlıya qarşı şikayəti ona borclu olan və məhkəmənin qərarı ilə borcunu qaytarmalı olan şəxs verib. Buna baxmayaraq, Qasımlı bu şəxsi təhdid etməkdə ittiham olunub.

Qasımlı hökumətin daxili və xarici siyasətini tənqid etməsi ilə məşhurdur. Xüsusən, o, jurnalistlərin və fəalların həbslərini, həmçinin Azərbaycanın xarici siyasətinin Rusiyaya tərəf dönməsini tənqid edirdi.