Azərbaycan ekspertləri Ulyukaevin saxlanması haqqında

RF iqtisadi inkişaf naziri Aleksey Ulyukaevin rüşvətə görə saxlanması Azərbaycanda rezonans doğurub.

Ekspert Natiq Cəfərli hesab edir ki, bu, Ulyukaev və Rusiya Mərkəzi Bankının rəhbərliyi arasında münaqişə ilə bağlı ola bilər. Belə ki, Ulyukaev liberal islahatçıların tərəfdarı idi və RF Maliyyə Nazirliyini və Mərkəzi Bankını maliyyə siyasətlərinə görə tənqid edirdi.

Baş verənləri Turan-a şərh edən Cəfərli deyib ki, Ulyukaevin digər hökumət üzvləri ilə ciddi fikir ayrılıqları var idi və o, iqtisadi inkişafa təkan verən proqramların həyata keçirilməsinə nail olmağa çalışırdı. Amma Maliyyə Nazirliyi və Mərkəzi Bank çox konservativ pul-maliyyə siyasətinin tərəfdarı idi.

RF hakim elitası arasında korrupsiya probleminə gəlincə, bu problem çoxdan təəccüb doğurmur və adi haldır.

“Əgər qubernator müavininin evindən milyardlarla rubl tapılırsa, adi polis polkovniki Zaxarçenkonun evindən axtarış zamanı 8 milyard rubl aşkarlanırsa, nazirin 2 milyon dollara görə həbs olunması ağlabatan görünmür. Bu, sırf rüşvət və ya korrupsiya məsələsi olsa idi, tamamilə fərqli bir yanaşma olardı. Yəni 2 milyon dollara görə belə böyük səs-küy gətirəcək həbs həyata keçirilməzdi”, deyə o qeyd edib.

Rusiyadakı və Azərbaycandakı vəziyyəti müqayisə edən Cəfərli deyib ki, Azərbaycanda biznesin həcmi və onun iştirakçılarının sayı azdır. “Bizdə böyük vəsaitlər dar bir çevrənin əlində  cəmləşib. Biznes mühiti də, vəsaitlər də Rusiyadan fərqli olaraq çox kiçikdir. Müstəqil bazar oyunçuları yoxdur. Bizneslə məmur çulğalaşıb. Bu səbədən də ciddi səs-küy gətirən həbslər və müsadirələr gələcəkdə ola bilər. Məmurlarla bağlı da gələn il müəyyən addımlar atıla bilər. Çünki ölkənin iqtisadi durumu gərginləşdikcə daxili çevrədə vəsait axtarışına çıxılacaq. Vəsaitin də dar çevrədə cəmləşdiyini nəzərə alaraq, bu əməliyyatların da dar çevrədə keçiriləcəyi istisna olunmur”, Cəfərli belə güman edir.

Digər məşhur iqtisadçı Qubad İbadoğlu da hesab edir ki, Ulyukaevin işində siyasi aspekt ola bilər. “Əgər bu əsaslar varsa, nazirin həbsi prezident Putinin opponentlərinə qarşı həyata keçirilən bir tədbir kimi qiymətləndirilə bilər”, deyə Qubadoğlu Turan-a müsahibəsində bildirib.

İki ölkədəki vəziyyətləri müqayisə edən ekspert qeyd edib ki, Azərbaycanda korrupsiyaya qarşı  mübarizə hələlik xırda və orta səviyyəli məmurlar səviyyəsində  dayanıb. Doğrudur, 2005-ci ildə iqtisadiyyat və səhiyyə nazirləri həbs olunub, lakin səbəblər siyasi idi, baxmayaraq ki, onları da korrupsiyaya görə həbs etmişdilər.

O, həmçinin məmurları öz gəlirlərini və əmlakını bəyan etməməsi faktını da kəskin tənqid edib.

Amma bu gün bütün dünyada korrupsiyaya qarşı mübarizənin əsas istiqaməti gəlirlərin şəffaflığıdır. Təəssüf ki, Azərbaycanda hələ də gəlirlər bəyan olunmur. Azərbaycan hakimiyyəti bu məsələni həll etməlidir.

“Bu baş verməyincə Azərbaycanda korrupsiyaya qarşı mübarizənin səmimiliyinə  inamaq düzgün deyil.

Dövlət başçısından başlayaraq, sadə məmura qədər hər bir şəxs həm işə qəbul olunanda, həm də işlədiyi dövrdə gəlirləri və əmlakları ilə bağlı məlumat verməlidirlər”, deyə o           qeyd edib. -03В-