Azərbaycan Fransaya etirazını bildirib 

Bakı/12.09.19/Turan: Azərbaycan XİN bir qrup fransalı parlamentarinin Ermənistan Silahlı Qüvvələri tərəfindən işğal edilmiş Dağlıq Qarabağa səfərini pisləyib. Bununla əlaqədar Fransanın Azərbaycandakı müvəqqəti işlər vəkili XİN-ə çağırılıb və Fransa tərəfinə ünvanlanmış etiraz notası ona təqdim edilib.

XİN mətbuat xidmətinin məlumatında deyilir ki, notada əsas diqqət ona yönəlib ki, bu cür qanunsuz səfərlərin həyata keçirilməsi ATƏT-in Minsk Qrupu həmsədrlərinin, o cümlədən Fransanın Ermənistan-Azərbaycan, Dağlıq Qarabağ münaqişəsinin danışıqlar yolu ilə həll olunması məqsədini güdən səylərini ciddi şəkildə sarsıdır, eyni zamanda bu prosesdə vasitəçi qismində Fransanın nüfuzuna xələl gətirir.

Azərbaycan XİN Fransa hökumətini bir daha bu ölkənin parlamentarilərinin Azərbaycan ərazilərinin işğalı nəticəsində yaranmış status-kvonun möhkəmləndirilməsinə yönəlmiş qanunsuz səfərlərinin qarşısını almaq üçün qətiyyətli tədbirlər görməyə və bununla da, öz beynəlxalq öhdəliklərinin düzgün yerinə yetirilməsi maraqlarını rəhbər tutaraq, nizamlamada vasitəçi kimi qərəzsiz yanaşmasının ardıcıllığını təsdiq etməyə çağırır.

Bəyanatda qeyd olunur ki, səfər Fransanın erməni lobbisinin təsiri altında olan deputatlar, o cümlədən əvvəlki qanunsuz səfərləri səbəbindən adı artıq Azərbaycana girişi arzuolunmaz şəxslər siyahısında yer alan Gi Tesye tərəfindən həyata keçirilib.

Ona qoşulan digər iştirakçıların, millət vəkilləri Valeri Buayer, Jan-Pyer Cübertafon, Məhəmməd Laqhila, Daniel Kazaryan, Giyom Kasparyan və senator Pyer Uzuliasın adları həmin siyahıya salınacaq.

Fransalı parlamentarilər işğal edilmiş ərazilərə sentyabrın 10-da gediblər və qanunsuz rejimin nümayəndələri ilə görüşüblər. 06D--