Azərbaycan Keniya və Tailand ilə birlikdə BMT-yə qətnamə təqdim edib

Bakı/27.02.18/Turan: Demokratiyanın möhkəmlənməsi və insan hüquqlarının qorunması Azərbaycanın ən vacib prioritetləri arasındadır. Bu barədə XİN rəhbəri Elmar Məmmədyarov bu gün BMT İnsan Hüquqları Şurasının 37-ci sessiyasındakı çıxışında bildirib.

"Hökumət Azərbaycan vətəndaşlarının bütün insan hüquqlarından və əsas azadlıqlardan tam yararlanması zəruri şəraitin yaradılması istiqamətində genişmiqyaslı proqramlar həyata keçirir", - E.Məmmədyarov qeyd edib.
Onun sözlərinə görə, təhsil ölkənin daxili siyasətində ən prioritetdir, çünki yaxşı təsis edilmiş təhsilli cəmiyyət uğurlu və davamlı inkişafın zəmanətlərindən biridir. Hər il 5 milyondan çox insan - ölkə əhalisinin yarısı - dövlət büdcəsindən tam maliyyələşməklə tibbi yoxlanışdan keçir. Ancaq nazir həmin xidmətlərin keyfiyyətindən danışmayıb.

Azərbaycan hələ 1918-ci ildə müsəlman dünyasında qadınları səs vermək hüququ ilə təmin etmiş ilk ölkədir. Azərbaycan gender bərabərliyinini təmin etməyə və ictimai və sosial həyatda qadınların rolunun artırılmasına çalışır.

Azərbaycan əhalisinin 80%-nin İnternetə maneəsiz giriş imkanı var.
Cinayət hüququ sisteminin beynəlxalq insan hüquqları standartlarına tam uyğun olması məqsədilə islahatlar aparılıb. Bu sahədə ən son addımlardan biri cəza siyasətinin humanistləşdirilməsi ilə bağlı prezidentin sərəncamıdır.
Azərbaycan dünyanın tanınmış multikultural mərkəzlərindən biridir. Azərbaycan inkişaf hüququna böyük əhəmiyyət verir.

"Biz insan hüquqlarının və davamlı inkişafın bir-birindən asılı olduğunu və bir-birini tamamladığını bilirik. 2030-cu il Davamlı İnkişaf Gündəliyi (DİG) insan hüquqlarına hörmət, qanunun aliliyi, yaxşı idarəetmə və effektiv ictimai institutlar əsasında sülhpərvər, ədalətli və inkluziv cəmiyyətlərin qurulmasına zərurəti olduğunu qəbul edir. Bununla yanaşı, Azərbaycan Gürcüstan, Keniya, Tailand və Türkiyə ilə birlikdə Şuranın hazırkı sessiyasında qəbul edilmək üçün "Şəffaf, məsuliyyətli və səmərəli dövlət xidməti vasitəsilə insan hüquqlarının və DİG-in təşviqi" adlı layihə qətnaməsi təqdim edib. Bu fürsətdən istifadə edərək mən İHŞ üzvlərini qətnaməni dəstəkləməyə çağırıram", - E.Məmmədyarov deyib.
O qeyd edib ki, Azərbaycan İnsan Hüquqları Şurasının fəaliyyətinin gücləndirilməsinin zəruriliyini tam dəstəkləyir. Şura tənbeh üçün platforma yox, nüfuzlu orqan olmalıdır. Odur ki, onun fəaliyyətini müəyyən edən əsas anlayışlar "dialoq", "əməkdaşlıq" və "yardım" olmalıdır.
Qarabağ probleminə toxunan nazir deyib: "Ermənistanın silahlı təcavüzünün nəticəsində Azərbaycan ərazisinin 20%-i 25 ildən çoxdur ki, işğal altındadır. Bir milyondan çox azərbaycanlı etnik təmizlənməyə məruz qalıb və doğma yurd-yuvalarını tərk edərək öz vətənlərində qaçqın və məcburi köçkün olmağa məcbur edilib.

Ermənistan Azərbaycanın ərazi bötüvlüyünü bir daha təsdiq edən və işğal olunmuş ərazilərdən Ermənistan Silahlı Qüvvələrinin dərhal, tam və qeyd-şərtsiz çıxarılmasını tələb edən BMT Təhlükəsizlik Şurasının müvafiq qətnamələrini və digər beynəlxalq təşkilatların aidiyyəti sənədlərini inkar etməklə Azərbaycan ərazilərinin işğalını davam etdirir.
Biz BMT İnsan Hüquqları Şurasını, onun mandat sahiblərini və BMT İnsan Hüquqları üzrə ali komissarını BMT Təhlükəsizlik Şurasının və Baş Assambleyanın müvafiq qətnamələrinə uyğun olaraq azərbaycanlı qaçqın və məcburi köçkünlərin pozulmuş insan hüquqlarının səmərəli müdafiəsini təmin etməyə çağırırıq.-06D-