Azərbaycan Prezidenti Rusiya Prezidentinə zəng edib

Martın 24-də Azərbaycan Respublikasının Prezidenti İlham Əliyev Rusiya Federasiyasının Prezidenti Vladimir Putinə zəng edib.

Azərbaycan Prezidentinin Administrasiyasının məlumatına görə, dövlət başçısı “Crocus City Hall” konsert zalında törədilmiş terror aktı nəticəsində xeyli sayda insanın həlak olması ilə bağlı öz adından və Azərbaycan xalqı adından Vladimir Putinə, Rusiya xalqına, həlak olanların ailə üzvlərinə və yaxınlarına bir daha başsağlığı verib, bütün yaralananların tezliklə sağalmasını arzulayıb.

Prezident İlham Əliyev Azərbaycan tərəfinin bu dəhşətli terror aktını qətiyyətlə pislədiyini bildirərək ölkəsinin və xalqının bu ağır saatlarda Rusiyanın və Rusiya xalqının yanında olduğunu qeyd edib.

Dövlət başçıları gələcəkdə də terrorçuluğa qarşı mübarizə sahəsində birgə səylərin davam etdiriləcəyini vurğulayıblar.

Rusiya Prezientinin rəsmi internet saytında yayılan məlumatda isə deyilir ki, Prezident İlham Əliyev ümumxalq hüzn günündə Azərbaycanın bütün sakinlərinin Rusiya xalqı ilə həmrəy olduğunu vurğulayıb və cinayətkarların və onların arxasında duranların qaçılmaz ağır cəzaya məruz qalacağına əminliyini bildirib.
Vladimir Putin öz növbəsində dəstək sözlərinə görə təşəkkür edib və iki dövlətin strateji tərəfdaşlıq və müttəfiqlik ruhunda əməli qarşılıqlı fəaliyyəti daha da gücləndirməyə hazır olduğunu qeyd edib.