Azərbaycan Suriya üzrə donor konfransına hansı töhfəni verəcək?

Azərbaycan prezidenti İlham Əliyev Suriya üzrə donor konfransında iştirak etmək üçün Londona gedib. Konfrans cümə axşamı BMT-nin təşəbbüsü və bəzi Avropa ölkələrinin dəstəyilə keçirilir. Bu barədə Azərbaycan prezidentinin saytında məlumat verilib.

Konfrans Böyük Britaniya, Almaniya, Norveç, Küveyt və BMT tərəfindən təşkil edilib. Məqsəd Suriyada beşillik müharibədən zərər çəkənlər üçün maliyyə vəsaitinin toplanması və humanitar proqramların həyata keçirilməsidir. Donorlar tərəfindən 9 mlrd. dolların cəlb edilməsi planlaşdırılır.

Suriya ilə həmsərhəd olan və 4,6 mln. qaçqını qəbul edən Türkiyə, Livan və İordaniya kimi ölkələr operativ qaydada 1,2 mlrd. dollar alacaqlarına ümud edirlər, - konfrans təşkilatçıları bildiriblər.

Ciddi iqtisadi böhranla üzləşən Azərbaycanın hansı maliyyə töhfəsini verməyi planlaşdırdığı hələlik məlum deyil.

Yanvarın 10-da hökumətin iclasında çıxış edən prezident İlham Əliyev bildirib ki, Suriya və İraqdakı vəziyyət onu ciddi narahat edir. “Biz bu regionda yaşayırıq və burada baş verən hadisələr istər-istəməz bizə də təsir edir... Milyonlarla adam qaçqın və köçkün vəziyytində yaşayır. Həmin adamların taleyi təbii ki, bizi də narahar edir. Belə ki, vaxtilə biz özümüz də böyük humanitar fəlakətlə üz-üzə qalmışdıq”, - o vurğulayıb.

BMT Qaçqınlar üzrə Agentliyin Bakı ofisinin məlumatına görə, Azərbaycana Suriyadan dörd qaçqın ailəsi gəlib.—0—