Azərbaycan və Gürcüstan QHT-lərinin nümayəndə heyətləri Aİ Konfransının vətəndaş cəmiyyəti ilə bağlı yekun bəyannaməsini dəstəkləməyiblər

Tallin/25.10.17/Turan: Azərbaycan və Gürcüstan QHT-lərinin nümayəndələri Avropa İttifaqının Şərq Tərəfdaşlığı Proqramının Tallində keçirilən "İnsanlar üçün real nəticələr: 2020-ci ildə və daha sonra Şərq Tərəfdaşlığı necə olacaq?" mövzusunda vətəndaş cəmiyyəti konfransının yekun bəyannaməsini imzalamaqdan imtina ediblər.

Turan-ın xüsusi müxbirinin Tallindən verdiyi məlumata görə, buna bəyannamənin Aİ-yə münaqişə zonalarında işləyən QHT-lərin birbaşa maliyyələşdirilməsi haqqında tövsiyələr nəzərdə tutan bəndi səbəb olub.

Azərbaycan və Gürcüstan nümayəndə heyətləri hesab edirlər ki, bu maddə müstəqilliyini elan etmiş separatçı "respublikalarda" QHT-lərin Aİ-dən birbaşa investisiyalar almasına xidmət edir.

Amma Azərbaycan və Gürcüstan nümayəndə heyətləri bu bəndi bəyannamə mətnindən çıxartdırmağa müvəffəq olmayıb. Konfransda iştirak edən cəmi 66 nümayəndə bu bəndin mətndən çıxarılmasının lehinə səs verib. Buna cavab olaraq hər iki nümayəndə heyəti bütünlükdə yekun bəyannamə mətni üzrə səsvermədə iştirakdan imtina etmək barədə razılığa gəliblər. -71D-