Azərbaycan və İtaliya iqtisadi əlaqələri möhkəmləndirir

Bakı/13.02.23/Turan: Prezident İlham Əliyev bazar ertəsi İtaliyanın şirkətlər və "Made in Italy" naziri Adolfo Ursonun başçılıq etdiyi nümayəndə heyətini qəbul edib.

Söhbət zamanı Əliyev ikitərəfli münasibətlərin yüksək səviyyədə olduğunu qeyd edib, son bir ayda İtaliyanın üç nazirinin Azərbaycana səfəri bunu göstərir.

"Bu səfərlər zamanı biz həm hərbi, hərbi-texniki, energetika və bütövlükdə investisiya, ticarət sahələrində əməkdaşlığı müzakirə etmişik və edəcəyik", deyə Əliyev qeyd edib.

Dövlət başçısı neft-qaz sahəsindəki layihələrin xüsusi əhəmiyyətini qeyd edib, bunun ikitərəfli münasibətləri əhəmiyyətli dərəcədə möhkəmləndirdiyini bildirib. Bundan başqa, İtaliya şirkətləri azad olunmuş ərazilərdə - Qarabağda və Şərqi Zəngəzurda həyata keçirilən layihələrdə fəal şəkildə iştirak edir.

Xüsusən, o, İtaliyanın "Iveco" şirkətinin artıq azad olunmuş ərazilərdə öz müəssisələrini yaratmağa start verdiyini, burada yük maşınları istehsal edəcəyini bildirib.

Dövlət başçısının saytında yer alan məlumatda deyilir ki, görüşdə bərpa olunan enerji, kənd təsərrüfatı, maşınqayırma, əczaçılıq, elm və təhsil, mədəniyyət sahəsində əməkdaşlığın perspektivlərinə toxunulub. 02D