Azərbaycan və Qazaxıstan Xəzərdə yükdaşımaları artırmaq niyyətindədir

Bakı/22.06.23/Turan: Bu gün prezident İlham Əliyev Azərbaycanda səfərdə olan Qazaxıstanın baş naziri Əlixan Smailovu qəbul edib, dövlət başçısının saytı bildirib.

Azərbaycanla Qazaxıstan arasında münasibətlərin strateji xarakterindən danışan İlham Əliyev qeyd edib ki, ikitərəfli əlaqələr "bütün sahələrdə uğurla inkişaf edir və geniş gündəliyə malikdir".

Əliyev deyib ki, Azərbaycanla Qazaxıstan arasında əlaqələr regional əməkdaşlıq baxımından da böyük əhəmiyyət kəsb edir.

Smailov  Azərbaycanla Qazaxıstan arasında münasibətlərin strateji tərəfdaşlıq xarakteri daşıdığını, bütün sahələrdə əməkdaşlığın uğurlu inkişafından məmnunluğunu bildirib.

Onun sözlərinə görə, Azərbaycan Cənubi Qafqazda Qazaxıstanın ən mühüm iqtisadi və ticarət tərəfdaşıdır. Belə ki, ötən ilin yekunlarına görə, qarşılıqlı ticarətin həcmi 40 faiz artaraq 460 milyon dolları ötüb və bu il bu dinamika davam edir.

Tərəflər humanitar, neft və nəqliyyat sahələrində, informasiya-kommunikasiya texnologiyaları, gəmidüzəltmə və digər sahələrdə əməkdaşlıq məsələlərinə dair fikir mübadiləsi aparıblar. Azərbaycan, Qazaxıstan və üçüncü ölkələr arasında Orta dəhliz vasitəsilə Xəzər dənizilə yükdaşımaların həcminin artması məmnunluqla qeyd olunub, bu istiqamətdə birgə səylərin artırılmasının vacibliyi vurğulanıb. Söhbət zamanı Qazaxıstan şirkətlərinin Azərbaycanın işğaldan azad edilmiş ərazilərində müxtəlif layihələrdə iştirakı perspektivləri müzakirə olunub.

Bununla əlaqədar Qazaxıstanın Füzuli şəhərində Uşaq Yaradıcılığının İnkişafı Mərkəzinin tikintisi də yüksək qiymətləndirilib. 06B