Azərbaycan və Rusiya arasında gömrük məsələləri müzakirə edilib

Bakı/21.05.21/Turan: Moskvada Dövlət Gömrük Komitəsinin sədri Səfər Mehdiyev və Rusiya Gömrük Xidmətinin rəhbəri Vladimir Bulavin arasında görüş keçirilib.

Azərbaycan Gömrük Komitəsinin məlumatına görə, görüşdə gömrük nəzarəti nəticələrinin elektron formada qarşılıqlı tanınmasına dair protokolun tətbiqi, Yaraq-Qazmalar və Samur buraxılış məntəqələrində mövsümi xarakterli növbələrin aradan qaldırılması, yenidənqurma işlərindən sonra Tahirkənd-Qazmalar və Xanoba buraxılış məntəqələrinin fəaliyyətinin sinxronlaşdırılması, yük axınının Yaraq-Qazmalar-Samur avtomobil buraxılış məntəqəsindən Dərbənd-Yalama dəmir yolu məntəqəsinə paylanması məsələləri diqqət mərkəzində olub.

Tərəflər informasiya-kommunikasiya texnologiyaları sahəsində birgə əməkdaşlıq, Ümumdünya Gömrük Təşkilatı çərçivəsində qarşılıqlı fəaliyyətin effektivliyinin artırılması barədə də müzakirələr aparıblar.

Rusiya Gömrük Xidmətinin rəhbəri Vladimir Bulavin Azərbaycan gömrük xidmətinin narkotiklərin qanunsuz dövriyyəsinə qarşı mübarizə işini, xüsusilə son aylar bu sahədə görülən müsbət işləri, eləcə də Kinoloji Mərkəzin fəaliyyətini qeyd edib.

Azərbaycan Gömrük Komitəsinin sədri  Səfər Mehdiyev Azərbaycanın xarici ticarət dövriyyəsində Rusiyanın xüsusi çəkiyə malik olduğunu vurğulayıb, iki ölkənin iqtisadi və ticarət münasibətlərinin daha da inkişaf etdirilməsi üçün mövcud olan əlavə imkanlardan səmərəli istifadə olunacağını deyib. -03-