Azərbaycan XİN Calina Porterin şərhlərini tənqid edib

Bakı/26.03.22/Turan: Azərbaycan XİN ABŞ dövlət Departamentinin mətbuat xidmətinin rəhbərinin müavini Calina Porterin KİV nümayəbdələri ilə görüşü zamanı Azərbaycanın Qarabağ bölgəsi ilə bağlı səsləndirdiyi fikirə reaksiya verib.

Porter dünən brifinqdə ABŞ-ın Azərbaycan qoşunlarının yerdəyişməsindən "dərin narahatlıq hissi keçirdiyini" bildirərək, bunu "lazımsız eskalasiya tədbirləri" adlandırıb.

Bununla əlaqədar Azərbaycan XİN-in mətbuat xidməti təəssüf hissi ilə qeyd edib ki, Ermənistanın Azərvaycana qarşı 30 ilə yaxın davam edən hərbi təcavüzünə son verilməsi üçün bu illər ərzində ATƏT-in Minsk Qrupunun həmsədri qismində ABŞ tərəfindən heç bir effektiv addım atılmayıb.

Azərbaycan özü beynəlxalq hüquq əsasında ərazi bütövlüyünü bərpa edib və BMT TŞ qətnamələrinin icrasını təmin edib, deyə nazirlikdən bildiriblər.

Bununla yanaşı, xarici siyasət idarəsindən qeyd ediblər ki, hazırda “Dağlıq Qarabağ” anlayışı mövcud deyil, Azərbaycanın tərkib hissəsi olan Şərqi Zəngəzur və Qarabağ iqtisadi rayonları mövcuddur.

"Saxta erməni təbliğatı əsasında ABŞ Dövlət Departamenti rəsmisi tərəfindən belə bir açıqlamanın verilməsi özü məsuliyyətsiz bir davranışdır", deyə Azərbaycan XİN-in mətbuat xidmətinin şərhində qeyd edilir.

Sonda rəsmi Bakı vurğulayır ki, Azərbaycan Respublikası öz suveren ərazilərində fəaliyyət göstərir. -06B-