Azərbaycan XİN Kanada nazirinə cavab verib

Bakı/26.04.23/Turan: Azərbaycan tərəfinin Laçın-Xankəndi yolunun başlanğıcında Azərbaycan-Ermənistan sərhədində nəzarət-buraxılış məntəqəsi təsis etməsi ilə əlaqədar Kanada xarici işlər naziri Melani Jolinin 25 aprel tarixli bəyanatı ciddi anlaşılmazlıq yaradır.

Bu barədə Azərbaycan XİN-in Kanadanın xarici işlər nazirinə cavabında deyilir.

Məlumatda bildirilir ki, Kanada tərəfinə məlum olmalıdır ki, Azərbaycan tərəfindən öz suveren ərazisində sərhəddə nəzarət-buraxılış məntəqəsi təsis etməsi ölkənin legitim hüququdur və bütün beynəlxalq qaydalar çərçivəsindədir.

"Bu məntəqənin təsis edilməsi Ermənistan tərəfinin Üçtərəfli bəyanatın müddəalarına zidd olaraq Azərbaycana qarşı hərbi təxribatları dayandırmaması, yoldan qeyri-qanuni fəaliyyətlər, silah-sursat və minaların daşınması üçün istifadə edildiyi, hərbçilərinin rotasiyasının həyata keçirməsi vəziyyətində qəbul edilmiş milli təhlükəsizlik qərarıdır. Bu xüsusda, qeyd edilən məntəqənin təsis edilməsinin sülh prosesinə və bölgədə sabitliyə təsir etdiyi barədə fikirlər yanlışdır. Əksinə, bu addımın atılması sözügedən qeyri-qanuni fəaliyyətlərin effektiv qarşısının alınmasına xidmət edəcək.

Bununla yanaşı, Laçın yolunun bağlı olması ilə bağlı Kanada tərəfinin iddiasının heç bir əsası yoxdur. Sərhəd-nəzarət buraxılış məntəqəsi yola sərhəddən giriş-çıxış rejimini tənzimləyəcək", deyə məlumatda bildirilir.

Azərbaycan XİN üçtərəfli bəyanat üzrə öhdəliklərə uyğun olaraq, Laçın yolundan vətəndaşların, nəqliyyat vasitələrinin və yüklərin hərəkətinə Azərbaycan Respublikası tərəfindən təhlükəsizlik zəmanəti olan bu əlavə tədbir çərçivəsində Azərbaycanın Qarabağ bölgəsində yaşayan erməni sakinlərin bu məntəqədən hər iki istiqamətdə Ermənistana və Azərbaycana şəffaf və nizamlanan keçidi üçün müvafiq şəraitin mövcud olduğunu bir daha bəyan edir.

"Qeyd edilənlərlə yanaşı, Kanada xarici işlər nazirinin Azərbaycanın Qarabağ bölgəsinə yanlışlıqla “Dağlıq Qarabağ” kimi istinad etməsi qəbuledilməzdir. Bir daha açıqlamalarda bu kimi məqamlara Kanada tərəfindən diqqət yetirilməsini zəruri hesab edirik", deyə sənəddə qeyd edilir.

Qeyd edək ki, Kanadanın xarici işlər naziri Melani Jolininin aprelin 25-də verdiyi bəyanatda deyilir ki,Kanada Azərbaycanın Dağlıq Qarabağla ətraf rayon arasında yeganə quru əlaqəsi olan Laçın dəhlizində nəzarət-buraxılış məntəqəsi yaratmasından dərin narahatdır.

"Bu hərəkət açıq şəkildə bütün regionda sülh prosesini və sabitliyi pozur.

Biz Azərbaycan hakimiyyətini Laçın dəhlizini yenidən açmağa çağırırıq. İnsanların və malların sərbəst hərəkətinə imkan vermək üçün dəhliz açıq və maneəsiz qalmalıdır.

Kanada hər iki tərəfi danışıqları davam etdirməyə və sərhəddə hər hansı bir gərginlik və ya düşmənçilik hərəkətlərindən çəkinməyə çağırır", deyə Kanada naziri bildirib. 16D